Gitifu w’umurenge wa Jali na Gitifu w’akagari ka Agateko batawe muri yombi
RIB yataye muri yombi Umunyamabanga Nshingwabikorwa w’Umurenge wa Jali, Alexis BUCYANA n’uw’Akagali ka Agateko, Ephrem NDAGIJIMANA, bacyekwaho icyaha cyo kwaka no kwakira ruswa kugirango batange uruhushya rwo kubaka mu buryo bunyuranyije n’amategeko.
Abafashwe bafungiye kuri Sitasiyo za Kimironko na Gisozi mu gihe dosiye yabo iri gutunganywa ngo ishyikirizwe Ubushinjacyaha.
RIB irashimira abaturarwanda bakomeje gutanga amakuru kuhagaragaye ruswa kugirango abayigizemo uruhare bahanwe mu rwego rwo kuyihashya.
Amakuru HANGA News iherutse kubagezaho , nuko mu gitondo cya taliki ya 02/2/2023 ahagana saa tatu z’igitondo, nibwo imodoka y’irondo y’umurenge wa Jali, akarere ka Gasabo, yazamutse ipakiye abo bita Manpower (Abayedi) abandi bakabita barushenyi, bari barangajwe imbere na Gitifu w’Akagali k’Agateko witwa Ndagijimana Emphrem, bagiye mu Mudugudu wa Rwankuba gusenya inzu bavuga ko bakuraho akajagali kubatswe n’umusore witwa NZAYISENGA Theoneste uri mu kigero k’imyaka 22.
Uyu musore byamuviriyemo kwiyahura, amahirwe Polisi yaratabaye basanga atarashiramo umwuka , intandaro yabyose nuko uyu musore bamusenyeye bihimura ko yabimye Ruswa.
Ubwo basenyeraga uyu muturage bimuviramo kwiyahura.
Inzu bamusenyeye.
