Kimisagara: Hibutswe ku nshuro ya 32 Jenoside yakorewe Abatutsi, hibandwa ku mateka yihariye y’uyu Murenge
Kuri uyu wa tariki ya 16 Mata 2026, Umuyobozi Nshingwabikorwa Wungirije w’Akarere ka Nyarugenge, Madamu Uwamahoro Jenevieve, yifatanyije n’abaturage b’Umurenge wa Kimisagara mu gikorwa cyo Kwibuka ku nshuro ya 32 Jenoside yakorewe Abatutsi mu 1994, by’umwihariko hibandwa ku mateka yihariye yaranze uyu Murenge.
Iki gikorwa cyitabiriwe n’abayobozi mu nzego zitandukanye, inzego z’umutekano, imiryango y’abazize Jenoside ndetse n’abaturage benshi batuye muri Kimisagara. Ni igikorwa cyaranzwe n’icyunamo, kuzirikana amateka ndetse no guha icyubahiro inzirakarengane zahatakarije ubuzima.
Amateka yihariye yibutswe agaruka ku itariki ya 16 Mata 1994, umunsi mubi utazibagirana ku Batutsi bari batuye mu yitwaga Segiteri Kimisagara.
Mbere yaho, ku wa 15 Mata 1994, umugore wari Konseye witwaga Karushara Rose, afatanyije na Radio RTLM, bashishikarije Abatutsi bari bihishe mu ngo no muri ruhurura ya Mpazi gusohoka, babizeza umutekano bababwira ko ubwicanyi bwarangiye.
Nyamara ku wa 16 Mata 1994, abo bose bari bavuye mu bwihisho bishwe urw’agashinyaguro. Iyi ni yo mpamvu uyu Murenge wahisemo iyi tariki nk’umwihariko wo kwibukiraho buri mwaka.
Ibikorwa byo kwibuka byabanjirijwe no gushyira indabo ku Rwibutso rwa Jenoside rwa Kigali, mu rwego rwo kunamira no guha icyubahiro Abatutsi bahashyinguye. Nyuma yaho, ibiganiro nyamukuru byakomereje ku kibuga cy’urusengero rwa Restoration Church Kimisagara, aho hatangiwe ubutumwa butandukanye bwibutsa amateka no gushishikariza kurwanya ingengabitekerezo ya Jenoside.
Mu ijambo rye, Umunyamabanga Nshingwabikorwa w’Umurenge wa Kimisagara, Ufiteyezu Damascene, yihanganishije imiryango y’abacitse ku icumu rya Jenoside, ashimangira ko Jenoside itari gushoboka iyo hatabaho ubuyobozi bubi bwariho icyo gihe. Yibukije ko ari inshingano za buri wese guharanira ko amateka mabi atazongera kubaho.
Madamu Uwamahoro Jenevieve we yagaragaje ko nubwo amateka ya Jenoside muri Kimisagara agaragaza ubugwari n’ubugome bukomeye bwari bushyigikiwe n’abari abayobozi, kuri ubu hari icyizere cy’ejo hazaza heza. Yashimangiye ko igihugu gifite ubuyobozi bwiza bushyira imbere ubumwe n’ubwiyunge, bityo ko Jenoside itazongera kubaho ukundi.
Yasoje asaba abaturage gukomeza kubaka u Rwanda ruzira amacakubiri, barangwa n’urukundo, ubumwe no guharanira iterambere rirambye, mu rwego rwo gusigasira amateka no guha agaciro ubuzima bw’abarokotse.
Iki gikorwa cyasize abaturage bongereye imbaraga mu rugendo rwo kwibuka, gusigasira amateka no kurwanya ingengabitekerezo ya Jenoside, hubakwa ejo hazaza harangwa n’amahoro n’ubumwe.
