Muhazi Water Supply System: Umushinga ugiye guhindura imibereho y’abaturage ibihumbi 500 ba Gatsibo na Kayonza
Abaturage barenga ibihumbi 500 bo muri Gatsibo na Kayonza bagiye kubona amazi meza avuye ku ruganda rwa Muhazi.
Abaturage basaga ibihumbi 500 bo mu mirenge umunani yo mu Turere twa Gatsibo na Kayonza bagiye gutangira kubona amazi meza binyuze ku muyoboro mushya n’uruganda rutunganya amazi rwuzuye ku nkengero z’Ikiyaga cya Muhazi.
Uyu mushinga wa Muhazi Water Supply System washyizwe mu bikorwa na WASAC Group mu rwego rwo gukomeza kugeza amazi meza ku baturage no guteza imbere imibereho myiza yabo.
Uruganda rw’amazi rwubatswe mu Murenge wa Murambi, Akarere ka Gatsibo, rufite ubushobozi bwo gutunganya metero kibe ibihumbi 12 by’amazi ku munsi.
Biteganyijwe ko aya mazi azafasha abaturage bo mu mirenge umunani kubona amazi meza kandi ahagije, bikagabanya ingendo ndende abaturage bakoraga bajya kuyashaka ndetse no gukemura ikibazo cy’ibura ry’amazi cyakunze kugaragara muri utu duce.
Umushinga wo kubaka uru ruganda n’umuyoboro uruhuza n’abaturage watwaye asaga miliyari 21 z’Amafaranga y’u Rwanda, bikaba bigaragaza ubushake bwa Leta bwo gushora imari mu bikorwa remezo by’ibanze bifitiye abaturage akamaro.
Bamwe mu baturage bavuga ko kubona amazi meza hafi yabo bizabafasha mu bikorwa bya buri munsi birimo isuku, guteka no kwita ku buzima, ndetse bikazamura imibereho n’iterambere ry’imiryango yabo.
Abayobozi bavuga ko uyu mushinga uzagira uruhare rukomeye mu guteza imbere ubuzima rusange, kugabanya indwara ziterwa n’umwanda no gufasha ibikorwa by’ubukungu birimo ubucuruzi n’ubuhinzi bukenera amazi.
Ni umwe mu mishinga minini y’amazi iri gushyirwa mu bikorwa mu Ntara y’Iburasirazuba hagamijwe kongera ingano y’abagerwaho n’amazi meza no gushyigikira gahunda ya Leta yo kugeza serivisi z’ibanze ku baturage bose.
