Huye:Umutima wanjye urasingiza Nyagasani”:Ku wa 16 Gicurasi, Saint Mary’s High School Kiruhura izizihiza umunsi mukuru w’ishuri
Ubuyobozi bwa Saint Mary’s High School Kiruhura buramenyesha inshuti z’ikigo, ababyeyi, abarezi ndetse n’abanyeshuri bahize ko ku wa Gatandatu tariki ya 16 Gicurasi 2026 hateganyijwe umunsi mukuru w’ishuri, aho bose batumiwe kwifatanya n’umuryango mugari w’iki kigo muri ibyo birori by’ibyishimo n’ishimwe.
Ibirori bizabera ku cyicaro cy’ishuri giherereye mu Kagari ka Kiruhura, Umurenge wa Rusatira, Akarere ka Huye mu Ntara y’Amajyepfo.
Uyu munsi mukuru uzabanzirizwa no gutanga amasakaramentu y’ibanze ku banyeshuri babyiteguye, mu Gitambo cya Misa kizabera muri Paruwasi ya Kiruhura. Biteganyijwe ko ibikorwa byose bizasozwa ku gicamunsi mu byishimo n’ubusabane.
Mu butumwa bwo gutumira abazakurikira ibi birori, ubuyobozi bw’ishuri bwagize buti:
“Umutima wanjye urasingiza Nyagasani” (Luka 1,46)”.
Basoje bashimira buri wese uzakomeza gushyigikira no kwifatanya na Saint Mary’s High School Kiruhura muri uwo munsi wihariye.
Saint Mary’s High School Kiruhura ni ishuri ryisumbuye riherereye mu Murenge wa Rusatira, Akarere ka Huye mu Ntara y’Amajyepfo. Ryashinzwe n’Ababikira ba Sainte Marie de Namur nyuma gato ya Jenoside yakorewe Abatutsi mu 1994, ritangira gukora mu mwaka wa 1999.
Mu ntangiriro, ishuri ryatangiranye abanyeshuri bagera kuri 75 gusa, rifite ibikorwaremezo bike cyane nk’amashuri abiri gusa, nta muriro ndetse n’amazi make. Abatangije iri shuri bayobowe na Sr Anastasie Murekeyisoni bashyize imbere uburezi bufite indangagaciro, urukundo n’ubumwe.
Uko imyaka yagiye ishira, ishuri ryagiye ritera imbere cyane:
Mu mwaka wa 2024, iri shuri ryizihije yubile y’imyaka 25 rimaze rishinzwe, abayobozi n’abaharangije barishimira uruhare ryagize mu guteza imbere uburezi mu Karere ka Huye no mu Rwanda muri rusange.
