Polisi y’u Rwanda yakiriye abanyeshuri ba Light Angels Academy mu rugendoshuri rw’ubumenyi
Abanyeshuri 50 n’abarezi 8 bo mu ishuri rya Light Angels Academy riherereye mu Murenge wa Jabana, Akarere ka Gasabo, kuri uyu wa Gatanu tariki ya 8 Gicurasi 2026, basuye icyicaro gikuru cya Polisi y’u Rwanda giherereye i Kacyiru mu Mujyi wa Kigali.
Uru rugendoshuri rwari rugamije gufasha aba banyeshuri gusobanukirwa inshingano, imikorere ndetse n’uruhare rwa Polisi y’u Rwanda mu kubungabunga umutekano w’abantu n’ibyabo.
Mu gihe cy’uruzinduko rwabo, abanyeshuri basobanuriwe ibikorwa bitandukanye bikorwa na Polisi y’u Rwanda binyuze mu mashami yayo anyuranye, harimo ibikorwa byo gukumira no kurwanya ibyaha, kubungabunga umutekano wo mu muhanda, ibikorwa by’ubutabazi ndetse n’imikoranire ya Polisi n’abaturage mu guharanira umutekano usesuye.
Aba banyeshuri kandi bahawe umwanya wo kuganira n’abapolisi bakorera ku cyicaro gikuru, bababwira uburyo Polisi ikoresha ikoranabuhanga n’ubunyamwuga mu kazi ka buri munsi, hagamijwe gutanga serivisi nziza no kurushaho kwegera abaturage.
Ubuyobozi bwa Light Angels Academy bwagaragaje ko uru rugendoshuri ari ingenzi mu gufasha abanyeshuri kwagura ubumenyi no gusobanukirwa uruhare rw’inzego z’umutekano mu iterambere ry’igihugu.
Abanyeshuri na bo bagaragaje ko bishimiye byinshi bungukiye muri uru ruzinduko, bavuga ko rwabafashije kumenya neza inshingano za Polisi y’u Rwanda no kurushaho kugira uruhare mu bikorwa byo kubungabunga umutekano aho batuye no ku ishuri.
