Mu Rwanda yizihije Umunsi Mpuzamahanga w’Uburenganzira bw’Abaguzi, hibandwa ku bicuruzwa bitekanye n’ikorwa rya serivisi nziza
Uyu munsi, Tariki ya 18/3/2026 u Rwanda rwifatanyije n’isi yose kwizihiza Umunsi Mpuzamahanga w’Uburenganzira bw’Abaguzi, wizihijwe ku nsanganyamatsiko igira iti: “Ibicuruzwa Bitekanye n’Serivisi Nziza, Umuguzi Wizera.”
Iyi nsanganyamatsiko ishimangira akamaro ko gutanga serivisi zinoze, ibicuruzwa bifite umutekano, ndetse no kongerera abaguzi ubumenyi n’ubushobozi bwo kumenya no gusaba uburenganzira bwabo.
Mu ijambo rye, Umuyobozi Mukuru wa RICA, Antoinette Mbabazi, yashimiye abafatanyabikorwa ku ruhare rwabo mu guteza imbere uburenganzira bw’abaguzi, ashimangira ko kugera kuri izi ntego bisaba ubufatanye bw’inzego zitandukanye.
Yagaragaje ko gushyira imbere umutekano n’ubwiza bw’ibicuruzwa na serivisi ari ingenzi mu kubaka icyizere cy’abaguzi no guteza imbere ubucuruzi burambye.
Yagize ati:”Abaguzi bafite ubumenyi n’ubushobozi ni inkingi y’isoko rikora neza. Bafasha guteza imbere ubucuruzi binyuze mu guhitamo ibicuruzwa bifite ubuziranenge no gusaba ko ababitanga bubahiriza inshingano zabo. Ibi bituma habaho irushanwa rishingiye ku bwiza, rikazamura icyizere ku isoko no kurengera inyungu z’impande zombi—abaguzi n’abashoramari.
Mu rwego rwo kurushaho kurinda abaguzi, Minisitiri w’Ubucuruzi n’Inganda na we yagaragaje ko hari ikibazo cy’ibicuruzwa biva hanze bidafite ubuziranenge bikomeje kugaragara ku isoko ry’u Rwanda. Yavuze ko Leta y’u Rwanda itazabyihanganira, ko hagiye gufatwa ingamba zikomeye zo kubihashya.
Yagize ati:’“Ibicuruzwa biva hanze bidafite ubuziranenge bigira ingaruka ku buzima bw’abaguzi no ku bukungu bw’igihugu. Tugiye kubihagurukira dufatanyije n’ibigo bya Leta bishinzwe kugenzura ubuziranenge, kugira ngo turinde isoko ryacu.”
Yakomeje ashimangira ko ibigo byashyizweho na Leta, birimo RICA n’izindi nzego zishinzwe igenzura n’ubuziranenge, bigiye kongererwa ubushobozi no gukaza ibikorwa byo kugenzura ibicuruzwa byinjira mu gihugu ndetse n’ibiri ku isoko imbere mu gihugu.
Yongeyeho ko ubufatanye buhamye hagati ya RICA, Banki Nkuru y’u Rwanda, inzego za Leta, urwego rw’abikorera ndetse n’abafatanyabikorwa mu iterambere ari ingenzi mu kubaka isoko rifite umutekano, rihamye kandi rinyuze mu mucyo.
Uru ruhare rw’ihuriro ry’izi nzego rutuma habaho igenzura rihagije ry’ibicuruzwa na serivisi, bityo bikarinda abaguzi no guteza imbere ubukungu bw’igihugu.
Mu gusoza, RICA yongeye gushimangira ko izakomeza kongera ibikorwa byo kwigisha abaturage ku burenganzira n’inshingano zabo nk’abaguzi, gukurikirana imikorere y’isoko, no gushyira mu bikorwa amahame n’ibipimo ngenderwaho mu itangwa rya serivisi n’ibicuruzwa.
Ibi bizafasha guhangana n’imihindagurikire y’isoko no kurinda imibereho myiza y’abaguzi.
Uyu munsi wabaye umwanya mwiza wo kongera kwibutsa buri wese ko uburenganzira bw’umuguzi ari inkingi y’isoko rinoze, rifite umutekano kandi ritanga icyizere ku barigana bose.
