Abanyamuryango ba FPR-Inkotanyi mu Murenge wa Kigali biyemeje kurwanya igwingira no kurushaho guteza imbere imibereho y’abaturage
Abanyamuryango b’Umuryango FPR-Inkotanyi bo mu Murenge wa Kigali, mu Karere ka Nyarugenge, bagaragaje ko bishimira iterambere bamaze kugeraho, banemeza ko bagiye gukomeza gushyira imbaraga mu kurisigasira no kuriteza imbere.
Ibi babigarutseho kuri iki Cyumweru, tariki ya 15 Werurwe 2026, mu Nteko Rusange y’Umuryango FPR-Inkotanyi yabahuje bagasuzumira hamwe ibimaze kugerwaho ndetse bakanaganira ku ntego bafite mu myaka iri imbere.
Abanyamuryango bagaragaje ko mu myaka itanu iri imbere biteguye gukora byinshi byihuse kandi bifitiye akamaro abaturage.
Mu byo bateganya gushyira imbere harimo kurwanya ikibazo cy’igwingira mu bana, aho biyemeje ko nta mwana ugomba kugaragaraho ikibazo cy’imirire mibi mu Murenge wa Kigali. Banahize ko nta mwana w’umunyamuryango ugomba guta ishuri.
Mu ijambo rye, Mbabazi Anne, Visi Chairperson wa FPR-Inkotanyi mu Karere ka Nyarugenge District, yasabye abanyamuryango kwirinda amakimbirane yo mu miryango kuko adindiza iterambere.
Yagize ati: “Iyo mu muryango harimo amakimbirane bituma iterambere ridindira. Ni ngombwa ko abanyamuryango babana neza, bakirinda ibibazo bishobora kubabuza gutera imbere.”
Yakomeje abasaba gufatanya kurwanya igwingira n’utujagari, bagaharanira kugira Kigali City icyeye, gitekanye kandi kirangwa n’iterambere rirambye.
Ku ruhande rwe, Harindintwari Cedrique, Chairperson w’Umuryango FPR-Inkotanyi mu Murenge wa Kigali Sector, yatangaje ko abanyamuryango bishimira uruhare rukomeye uyu muryango wagize mu guhindura amateka y’u Rwanda.
Yavuze ko kuba FPR-Inkotanyi yarahagaritse Jenoside yakorewe Abatutsi mu 1994 ikanunga Abanyarwanda ari imwe mu mpamvu zituma abanyamuryango bakomeza kuwishimira.
Ati: “Kuba FPR-Inkotanyi yarahagaritse Jenoside yakorewe Abatutsi ikanunga Abanyarwanda ni ikintu abanyamuryango twese twishimira cyane.”
Harindintwari Cedrique yakomeje avuga ko iterambere rigaragara muri uyu murenge ririmo imihanda yubatswe, imiturire myiza, umutekano usesuye ndetse n’imiyoborere myiza byose babikesha ubuyobozi n’icyerekezo bya FPR-Inkotanyi.
Muri iki gikorwa kandi hari hanitabiriye umuhanzi Eric Senderi wamamaye ku izina rya International Hit, aho yifatanyije n’abanyamuryango mu kwizihiza ibimaze kugerwaho no kubashimisha binyuze mu muziki.
Abitabiriye iyi Nteko Rusange bagaragaje ko bafite icyizere cy’uko mu myaka iri imbere bazakomeza gukorera hamwe, bagateza imbere imibereho myiza y’abaturage no gukomeza gusigasira ubumwe n’iterambere byagezweho.
