Urukiko rwategetse ifungwa ry’agateganyo rya DJ Toxxyk iminsi 30

Urukiko rw’Ibanze rwa Nyarugenge rwategetse ko DJ Toxxyk afungwa by’agateganyo iminsi 30, mu gihe iperereza ku byaha akurikiranyweho rikomeje.

DJ Toxxyk akurikiranyweho ibyaha birimo kwica bidaturutse ku bushake, gukoresha ibiyobyabwenge, guteza impanuka agahunga, ndetse n’ibindi byaha bifitanye isano n’iyo mpanuka yamuhuje n’urupfu rw’umuntu.

Mu isomwa ry’icyemezo cy’urukiko kuri uyu wa Gatatu i, tariki ya 21 Mutarama 2026, urukiko rwagaragaje ko hari impamvu zifatika zituma akomeza gukurikiranwa afunzwe, zirimo kuba yahisha ubutabera ibimenyetso cyangwa akabangamira iperereza aramutse arekuwe by’agateganyo.

Ubushinjacyaha bwari bwasabye ko afungwa by’agateganyo, buvuga ko dosiye irimo ibimenyetso bihagije bigaragaza uburemere bw’ibyaha ashinjwa, ndetse ko iperereza rigikomeje ku buryo kumufungura byateza imbogamizi.

Ku ruhande rwe, DJ Toxxyk n’abamwunganira mu mategeko bari basabye ko yakurikiranwa adafunzwe, icyakora urukiko ntirwemeranya n’izo mpamvu.

Uyu mwanzuro usobanuye ko DJ Toxxyk azamara iminsi 30 afunzwe, mu gihe inzego z’ubutabera zikomeje gukusanya ibimenyetso bigamije kumenya ukuri ku byaha akekwaho, mbere y’uko hategurwa urubanza mu mizi.