#Kwibuka32: EP Gitega bibutse Jenoside yakorewe Abatutsi, Abanyeshuri basabwe kurwanya ingengabitekerezo yayo.
Kuri uyu wa 29 Gicurasi 2026, ubuyobozi, abarimu n’abanyeshuri b’Ikigo cy’Amashuri Abanza cya Gitega (EP Gitega), riherereye mu karere ka Nyarugenge, umurenge wa Gitega,bibutse ku nshuro ya 32 Jenoside yakorewe Abatutsi mu 1994, by’umwihariko bazirikana abari abarimu n’abarezi bishwe muri Jenoside.
Iki gikorwa cyo Kwibuka cyabimburiwe no gusura Urwibutso rwa Jenoside rwa Gitega, aho hashyinguwe imibiri y’abazize Jenoside yakorewe Abatutsi. Abitabiriye uyu muhango bashyize indabo ku mva ndetse bunamira inzirakarengane zishwe zizizwa uko zaremwe.
Mu butumwa yagejeje ku banyeshuri n’abarezi, umuyobozi wa EP Gitega, Niyonsenga Jean De Dieu, yasabye urubyiruko kuba umusingi mu kurwanya ingengabitekerezo ya Jenoside no guharanira ubumwe bw’Abanyarwanda.
Yagize ati: “Turashimira ubuyobozi bw’Igihugu kuko nta mwana ugihagurutswa mu ishuri abazwa ubwoko cyangwa avutswe amahirwe yo kwiga. Ibi bitwereka ko igihugu cyongeye kubakwa ku bumwe n’ubudaheranwa.”
Yakomeje asaba abanyeshuri gukura bafite indangagaciro zo gukunda igihugu, kubahana no kwamagana ivangura iryo ari ryo ryose, agaragaza ko urubyiruko rufite uruhare rukomeye mu kubungabunga amateka no gukumira Jenoside n’ingengabitekerezo yayo.
Abitabiriye iki gikorwa kandi bagaragarijwe amateka yaranze Jenoside yakorewe Abatutsi, banasobanurirwa uruhare amashuri n’abarezi bafite mu kurera abana bafite ubumuntu n’indangagaciro zubaka igihugu.
Mu Rwanda hose, ibikorwa byo Kwibuka ku nshuro ya 32 Jenoside yakorewe Abatutsi birakomeje, hibandwa ku gusigasira amateka no gukomeza kubaka igihugu gishingiye ku bumwe.
