Eid Al-Adha:Ku Mujyanama wa Mufti w’u Rwanda Mbarushimana Sulaiman hatambiwe ihene n’intama hagamijwe gusangira n’abakene

Mu rugo rw’Umujyanama wa Mufti w’u Rwanda habereye umuhango wo gutamba amatungo magufi mu kwizihiza Eid Al-Adha.

Mu rwego rwo kwizihiza umunsi mukuru wa Eid Al-Adha, mu rugo rw’Umujyanama wa Mufti w’u Rwanda, Mbarushimana Sulaiman, habereye umuhango wo gutamba amatungo magufi arimo ihene n’intama, mu rwego rwo kubahiriza inyigisho n’amabwiriza bya Kisilamu bijyanye n’uyu munsi mukuru w’igitambo.

Uyu muhango wabaye mu mwuka wo gusangira, gufashanya no kuzirikana abatishoboye, aho abayisilamu bibukijwe akamaro ko gutanga no gusangira n’abandi nk’uko biteganywa n’idini ya Islam.

Mbarushimana Sulaiman yavuze ko igikorwa cyo gutamba amatungo ku munsi wa Eid Al-Adha ari kimwe mu bikorwa bifite igisobanuro gikomeye mu kwemera kwa Islam, kuko kiba kigamije kubahiriza itegeko rya Allah no gukomeza kwimakaza urukundo n’ubufatanye hagati y’abantu.

Yagize ati:
“Turi kubahiriza amategeko n’amabwiriza ajyanye n’uyu munsi, kandi dushyira mu bikorwa itegeko rya Allah. Igice kimwe cy’inyama kiraguma mu rugo, ikindi kigahabwa abaturanyi, ikindi tukagisangira n’abatishoboye n’abakene.”

Yakomeje avuga ko Eid Al-Adha ari umwanya mwiza wo kwegera Imana no gusangira n’abandi, cyane cyane abafite ubushobozi buke, kugira ngo bose bishimire umunsi mukuru mu munezero no mu mahoro.

Amavu n’amavuko ya Eid Al-Adha:

Eid Al-Adha, izwi kandi nka Eid y’Igitambo, ni umwe mu minsi mikuru ibiri ikomeye cyane mu idini ya Islam. Uyu munsi wizihizwa hibukwa ukwemera n’ukumvira kwa Intumwa Ibrahim (Abraham), wemeye gutamba umwana we Ismail yubahiriza itegeko rya Allah.

Nk’uko bigaragara mu nyigisho za Islam, mbere y’uko Ibrahim asohoza icyo gitambo, Allah yamusimbuje intama kugira ngo ibe ari yo itambwa. Ni yo mpamvu abayisilamu ku Isi hose bazirikana uwo munsi batamba amatungo arimo intama, ihene, inka cyangwa ingamiya, bagamije kugaragaza ukwemera, ukumvira no gusangira n’abandi.

Eid Al-Adha iba kandi ihurirana n’ikorwa rya Hija ntagatifu (Hijja) i Maka muri Arabie Saoudite, aho abayisilamu baba basoza imwe mu nkingi eshanu zigize Islam.

Mu muco wa Kisilamu, inyama z’igitambo zisangirwa mu buryo bwihariye: igice kimwe kigasigara mu rugo, ikindi kigahabwa inshuti n’abaturanyi, naho ikindi kigahabwa abakene n’abatishoboye, hagamijwe kwimakaza urukundo, ubumwe n’ubufatanye muri sosiyete.

Abitabiriye umuhango wabereye kwa Mbarushimana Sulaiman bagaragaje ko ibikorwa nk’ibi bifasha abantu gukomeza gusigasira indangagaciro zo gufashanya no kwita ku batishoboye, cyane cyane mu bihe by’iminsi mikuru.

Uyu munsi mukuru wa Eid Al-Adha ukomeje kwizihizwa hirya no hino mu gihugu no ku Isi yose, abayisilamu basabwa gukomeza kwimakaza amahoro, urukundo no gufashanya hagati yabo n’abandi baturage muri rusange.