Kigali:Umuyobozi wa Gamico n’abandi bane bahamijwe ruswa mu rubanza rwaregwagamo abari abakozi ba RMB

Ku wa 12 Werurwe 2026, Urukiko Rwisumbuye rwa Nyarugenge rwasomye umwanzuro mu rubanza rwaregwagamo bamwe mu bari abakozi b’Ikigo cy’Igihugu gishinzwe Mine, Peteroli na Gaz (RMB) hamwe n’abacukuzi b’amabuye y’agaciro, bakekwagaho ibyaha bifitanye isano na ruswa mu itangwa rya serivise zijyanye n’ubucukuzi bw’amabuye y’agaciro.

Abari abakozi ba RMB baregwaga ni:

Kanyangira John, wari Division Manager for Mining Traceability

Niyongabo Richard, wari Division Manager for Mining Cadastre and Digital Information

Rwomushana Karemera Augustin, wari Division Manager for Mineral Market and Strategy Division

Bashinjwaga kuba baragiranye imikoranire n’abacukuzi b’amabuye y’agaciro babasabaga serivise zo kubona ibyangombwa by’ubucukuzi (Mining Licence) cyangwa tags, bagasabwa cyangwa bagasezeranywa indonke kugira ngo bahabwe izo serivise.

Abacukuzi b’amabuye y’agaciro bari bareganwe na bo ni:

Rubazinda Callixte, nyiri Calliane Mines Ltd

Ndagijimana Jean Philippe, nyiri Gamico Ltd

Kwizera Jean Bosco, nyiri DUMAC Ltd

Hakizinshuti Jonas, nyiri Ets HAJOS

Bose bashinjwaga kuba barahaye cyangwa barasezeranyije indonke bamwe mu bakozi ba RMB kugira ngo bahabwe serivise basabaga.

Abagizwe abere:

Urukiko rwagize abere abantu babiri:

Hakizinshuti Jonas:

Rwomushana Karemera Augustin

 

Urukiko rwategetse ko bahita barekurwa, nyuma yo gusanga nta bimenyetso bihagije bibahamya ibyaha baregwaga birimo:

gufata icyemezo gishingiye ku itonesha,
gusezeranya indonke, kudasobanura inkomoko y’umutungo.

Abahamwe n’ibyaha n’ibihano bahawe
Urukiko rwahamije ibyaha abantu batanu, rutegeka ko bahanishwa igifungo n’ihazabu.

Abakatiwe ni:

Kanyangira John: igifungo cy’imyaka 2 n’amezi 6 n’ihazabu ya 1,260,000 Frw

Niyongabo Richard: igifungo cy’imyaka 2 n’amezi 6 n’ihazabu ya 600,000 Frw

Ndagijimana Jean Philippe: igifungo cy’imyaka 2 n’amezi 6 n’ihazabu ya 660,000 Frw

Kwizera Jean Bosco: igifungo cy’imyaka 2 n’amezi 6 n’ihazabu ya 600,000 Frw

Rubazinda Callixte: igifungo cy’imyaka 2 n’amezi 6 n’ihazabu ya 600,000 Frw

Aba bose bahamijwe ibyaha birimo kwakira indonke ku ruhande rw’abakozi ba RMB no gutanga indonke ku ruhande rw’abacukuzi b’amabuye y’agaciro.

Uko urukiko rwabigenje:

Urukiko rwasobanuye ko hashingiwe ku ngingo ya 49 y’Itegeko No 68/2018 ryo ku wa 30 Kanama 2018 riteganya ibyaha n’ibihano muri rusange, umucamanza agena igihano arebye:

Uburemere bw’icyaha, ingaruka icyaha cyateye, impamvu zatumye gikorerwa, imyitwarire y’uwagikoze mbere ,n’uburyo icyaha cyakozwemo.

Urukiko rwasanze abahamijwe ibyaha batari basanzwe bafite imyitwarire mibi, kandi ko ari ubwambere bakoze icyaha, bityo rufata ko hari impamvu nyoroshyacyaha.

Hashingiwe ku ngingo ya 2 y’Itegeko No 059/2023 ryo ku wa 04/12/2023 rihindura Itegeko No 68/2018, urukiko rwagabanyije ibihano, ruvana ku gifungo cy’imyaka 5 rwari kubahanisha, rubigabanya rugera ku gifungo cy’imyaka 2 n’amezi 6.

Ibyaha byari bibakurikiranyweho
Mu byaha byari byabarezwe harimo:
Gusaba no kwakira indonke
Gutanga indonke cyangwa kuyisezeranya. NoGufata icyemezo gishingiye ku itonesha cyangwa ku bucuti

Kudasobanura inkomoko y’umutungo
Ibi byaha biteganywa kandi bigahanishwa n’Itegeko No 54/2018 ryo ku wa 13/08/2018 ryerekeye kurwanya ruswa.