Ngororero: Abaturage bavuga ko Padiri akomeje ubucukuzi bw’amabuye y’agaciro nubwo bwahagaritswe – Bashinja Gitifu Rutagisha kumukingira ikibaba

Abaturage bo mu Murenge wa Ndaro baratunga agatoki ubuyobozi ku bucukuzi bw’amabuye y’agaciro butemewe.

Imisozi barayitengaguye bayicukuramo amabuye y’agaciro.

Ngororero – 5 Nzeri 2026: Abaturage bo mu Mudugudu wa Kavumu, Akagari ka Bijyojyo, Umurenge wa Ndaro mu Karere ka Ngororero, bavuga ko bamaze igihe bahangayikishijwe n’ubucukuzi bw’amabuye y’agaciro bavuga ko bukorwa mu buryo bunyuranyije n’amategeko, ndetse bagashinja bamwe mu bayobozi kubikingira ikibaba.

Aba baturage baganiriye na HANGA NEWS kuri uyu wa 5 Nzeri 2026, bavuze ko ikibazo cy’ubucukuzi butemewe cyakomeje kubagiraho ingaruka, by’umwihariko nyuma y’impfu z’abantu bagiye bagwa mu birombe.

Abaturage bavuga ko hari abatakaje ababo mu birombe. Uyu we Avuga ko Padiri yamwimye impozamarira ngo yavuganye nk’itangazamakuru.

Mu gahinda kenshi, bamwe mu baturage bavuze ko bagiye batakaza abavandimwe n’abandi bo mu miryango yabo bapfiriye mu birombe by’amabuye y’agaciro, ariko bakavuga ko kugeza ubu batarabona ubutabera bifuza.

Batanga urugero rw’itariki ya 26 Kamena 2026, ubwo ikirombe cyagwiraga abantu bane, bose bakahasiga ubuzima.

Abaturage bavuga ko ikirombe cyari gifitanye isano n’ibikorwa by’umucukuzi witwa Ngaboyishema Alexis, uzwi ku izina rya Padiri. Bavuga ko nubwo ibikorwa by’ubucukuzi muri ako gace byahagaritswe, uyu muntu akomeje gukora ibikorwa bijyanye n’ubucukuzi, ndetse bakavuga ko atuye cyangwa akorera mu Mujyi wa Kigali.

Abaturage bavuga ko bahamagaye RIB.

Umwe mu baturage yagize ati:

«“Twebwe ubwacu twihamagariye RIB y’i Kigali. Hari inzu yari yuzuyemo amabuye y’agaciro ya forode, abakozi ba Padiri bari bayahishemo. Baraje bica urugi, bayakuramo batwaye amakamyo abiri yuzuye, ubu afungiye kuri sitasiyo ya RIB.”»

Inzu yakuwemo Forode y’amabuye y’agaciro.

Abaturage bavuga ko icyo gikorwa cyo gufata ayo mabuye cyabaye nyuma y’uko batanze amakuru ku nzego z’ubutabera.

Bavuga kandi ko nyuma y’icyo gikorwa, Gitifu w’Umurenge wa Ndaro, Aimable Rutagisha, yabahamagaye mu nama, akababwira ko abantu bari baje gusaka iyo nzu ari ibisambo kandi ko batagombaga kugira ubwoba.

Aba baturage bavuga ko mu gihe cy’iyo nama havuzwe ko amabuye yari yafashwe yaba ari aya Abayisenga Jean Jules.

Ngo yakuwemo Imodoka 2 zuzuye amabuye y’agaciro ya Forode.

Abayisenga Jean Jules ahakana ko afite aho ahuriye n’ayo mabuye.

HANGA NEWS yavuganye na Abayisenga Jean Jules, kugira ngo agire icyo avuga ku birego bimureba.

Yagize ati:

«“Namwe mubaze abaturage niba muri aho barabaha amakuru. Njyewe navuye mu bikorwa by’ubucukuzi bw’amabuye kera, ubu nibereye mu bundi bucuruzi. Ntaho mpuriye nabyo. Uwabivuze mumubaze aho yambonye.”»

Abayisenga yahakanye ko yaba afite aho ahuriye n’amabuye y’agaciro yafashwe, avuga ko kuva kera yaravuye mu bikorwa by’ubucukuzi.

Abaturage bavuga ko ubucukuzi bukomeje nubwo bwahagaritswe.

Abaturage bo muri aka gace bavuga ko hari abantu bakomeje ibikorwa by’ubucukuzi, nubwo bavuga ko ibirombe byari byarahagaritswe kubera impungenge z’umutekano.

Bavuga ko bamwe mu bantu bakorana n’uwitwa Padiri bakomeje kujya mu birombe, ndetse bakavuga ko hari n’ibindi bibazo by’umutekano bikomeje kugaragara muri ibirombe birimo umwuka wa gaze.

Umwe muri bo yagize ati:

«“Uwitwa Lambert, Karengetse na Rukara ni abakozi ba Padiri bacukura amabuye ku mugaragaro, Gitifu arebera. Nta kintu akora ngo ahagarike ibi bikorwa, kandi nawe abizi neza ko ibirombe byabujijwe kwinjiramo kuko harimo gaze nyinshi ikomeje guteza ibibazo abantu bapfiramo.”»

HANGA NEWS yageze ku biro bya Storofinare Ltd.

Mu rwego rwo gushaka amakuru arambuye no kumenya niba Padiri akomeje kugira uruhare muri ibi bikorwa, HANGA NEWS yagerageje kumuvugisha kuri telefone ariko ntiyaboneka.

Abaturage bavuga ko ibikorwa by’ubucukuzi bikomeje gukorwa n’abavandimwe cyangwa abakozi be mu gihe we adahari.

HANGA NEWS kandi yageze ku biro bya kompanyi Storofinare Ltd, abaturage bavuga ko ifitanye isano n’ibikorwa byabo. Umunyamakuru yahasanze hari umuntu wari uhicaye, ariko amakuru arambuye ku ruhare rwa kompanyi muri ibi bikorwa ntiyabashije kuyabona.

Gitifu wa Ndaro ntiyitabye telefone.

HANGA NEWS yagerageje kuvugisha Gitifu w’Umurenge wa Ndaro, Aimable Rutagisha, kugira ngo agire icyo avuga ku birego by’abaturage, cyane cyane ibivuga ko yaba akingira ikibaba abakora ubucukuzi butemewe.

Ntiyitabye telefone, ndetse n’ubutumwa bugufi bwamwohererejwe ntiyabusubije kugeza ubwo iyi nkuru yatangazwaga.

HANGA NEWS iracyamuhaye umwanya wo kugira icyo avuga, kandi ibisobanuro cyangwa igisubizo azatanga bizashyirwa mu nkuru ikurikira.

Abaturage basaba ko ikibazo gikurikiranwa.

Abaturage bo muri aka gace basaba inzego bireba gukurikirana ikibazo cy’ubucukuzi bw’amabuye y’agaciro bukorwa mu buryo bunyuranyije n’amategeko, cyane cyane mu gihe bavuga ko hari ibimenyetso by’uko abantu bakomeje kujya mu birombe bishobora guteza impanuka.

Banavuga ko hakwiye gukorwa iperereza ryigenga ku mpfu z’abantu bane bapfuye mu kirombe ku wa 26 Kamena 2026, ndetse hakamenyekana niba hari uwagombye kubazwa inshingano kuri iyo mpanuka.

Hari kandi abaturage bashinja bamwe mu bayobozi ruswa no gukingira ikibaba abacukuzi batemewe, bavuga ko ari yo mpamvu ibikorwa bavuga ko bitemewe bikomeje.

Icyakora, nta kimenyetso cyigenga HANGA NEWS yabonye muri iki gihe cyemeza ibyo birego bya ruswa, kandi abaregwa bafite uburenganzira bwo gusubiza no gutanga ibisobanuro.

Mu gihe inzego zibishinzwe zaba zitagize icyo zikora, abaturage batinya ko ubucukuzi bukorerwa ahantu bavuga ko hatemewe bushobora gukomeza guteza impanuka, gutwara ubuzima bw’abantu no guteza ibindi bibazo mu miryango.

HANGA NEWS izakomeza gukurikirana iki kibazo no kugeza ku basomyi ibisubizo by’inzego bireba ndetse n’abandi bose bafite aho bahuriye n’ibi birego.