Kubura ubuyobozi bufite icyerekezo byongera ruswa ku rwego rw’Isi – CPI 2025
Raporo ya Corruption Perceptions Index (CPI) 2025 ya Transparency International igaragaza ko ruswa iri kwiyongera ku rwego rw’isi, ndetse no mu bihugu bifite demokarasi zikomeye, bitewe n’igabanuka ry’ubuyobozi bufite icyerekezo mu kurwanya ruswa.
Uyu mwaka, umubare w’ibihugu bifite amanota arenga 80 wagabanutse uva kuri 12 mu myaka icumi ishize ugera kuri bitanu gusa, bigaragaza isubira inyuma rikomeje mu miyoborere n’ubunyangamugayo ku rwego mpuzamahanga.
Nubwo demokarasi zisanzwe zigira imbaraga mu kurwanya ruswa ugereranyije n’ubutegetsi bw’igitugu, raporo igaragaza ko nazo ziri kugabanuka mu musaruro. Ibi bigaragarira mu bihugu nka Leta Zunze Ubumwe za Amerika, Kanada na Nouvelle-Zélande, ndetse no mu bihugu by’i Burayi birimo u Bwongereza, Ubufaransa na Suwede.
Raporo inagaragaza impungenge ku igabanuka ry’ubwisanzure bwo gutanga ibitekerezo, kwishyira hamwe no guterana mu bihugu byinshi. Kuva mu 2012, ibihugu 36 muri 50 byagabanutse cyane mu manota ya CPI byanagabanyije umwanya w’imiryango sivile, bigaca intege uruhare rw’abanyamakuru, imiryango itegamiye kuri Leta n’abatanga amakuru mu kurwanya ruswa.
Mu 2025, imyigaragambyo myinshi yo kurwanya ruswa iyobowe n’urubyiruko rwa Generation Z yabaye cyane cyane mu bihugu bifite amanota make kuri CPI. Mu bihugu nka Nepal na Madagascar, urubyiruko rwigaragambije rushinja abayobozi gukoresha nabi ubutegetsi no kunanirwa gutanga serivisi nziza n’amahirwe y’ubukungu.
Transparency International iraburira ko kubura ubuyobozi bukomeye ku rwego rw’isi biri guca intege ibikorwa mpuzamahanga byo kurwanya ruswa, bikagabanya igitutu ku bihugu ngo bishyire mu bikorwa ivugurura rikenewe mu guteza imbere umucyo, uburyozwe n’imiyoborere myiza.
