Kwibuka31-Kigarama:Bamwe mu barokotse Jenoside yakorewe abatutsi basaniwe inzu 4 Indi imwe irubakwa
Mu murenge wa Kigarama, akarere ka Kicukiro, Umujyi wa Kigali, uyu wa 10/4/2025 bibutse ku nshuro ya 31 Jenoside yakorewe abatutsi Mata 1994, bamwe mu barokotse Jenoside batishoboye basaniwe amazu agera kuri 4, Mukarubibi Clementine n’umuvandimwe we Mukankaka Athanasia bashyikirizwa inzu nshya bubakiwe kubufatanye n’umuryango wa Upendo wa mungu.
Umubyeyi Mediatrice, umunyamabanga Nshingwabikorwa w’umurenge wa Kigarama, yavuze ko inzu zose hamwe zihabwa bamwe mu barokotse Jenoside yakorewe abatutsi batishoboye zigera kuri 5 zuzuye zitwaye asaga Miliyoni 35 Rwf ,ashimira cyane umufatanyabikorwa Upendo wa mungu wagize uruhare rukomeye muri iki gikorwa, Yagize ,ati:”Ndashimira by’umwiharimo umufatanyabikorwa Upendo wa mungu, ntibyari byoroshye,hamwe n’Imana twiringira uyu munsi turi mu mashimwe barakoze cyane, ubwitange bwabo bigaragaza ko bitangira igihugu by’umwihariko bita cyane ku batishoboye barokotse Jenoside yakorewe abatutsi”.
Pasteri Karangwa Alphonse umushumba w’itorero rya ADPER, Karugira-Kigarama, ari nawe muyobozi w’umuryango wa Upendo wa mungu yavuze ko, badaharanira inyungu zabo bwite kuko ibikorwa byabo bigamije ubwitange no gufasha cyane abatishoboye, Yagize ati:”Turi abanyamuryango basaga 80 batuye ahantu hatandukanye hirya no hino mu gihugu, twe ibikorwa byacu nta nyungu bwite duharanira ndetse nta n’inkunga zo hanze tubona nitwe ubwacu twishakamo ubushobozi”.
Yakomeje avuga ko, uyu munsi bishimiye igikorwa kiza cyo gutaha inzu bubakiye bamwe mu batishoboye barokotse Jenoside yakorewe abatutsi mu murenge wa Kigarama, Ati:”Ubuyobozi bw’umurenge wa Kigarama,baratwegereye batwereka inzu z’abarokotse Jenoside yakorewe abatutsi batishoboye zikenewe gusanwa hari n’izindi zikwiye kubakwa, twabigize ibyacu ubwitange bwacu n’imbaraga tubihuriza hamwe none uyu munsi turi hano kwishimana n’abagenerwabikorwa bacu , cyane tunashimira ubuyobozi bwiza bw’igihugu kuko nibwo bwaduhaye umurongo mwiza wo gushyira hamwe mu rwego rwo kuzamurana twiteza imbere”.
Mu mudugudu wa Rutoki, Akagali ka Karugira hamwe n’umuvandiwe we Mukankaka Athanasia, Mukarubibi Clementine yahawe inzu yubakiwe , mu byishimo byinshi yagaragaje imbere y’ubuyobozi yagize ati:'”Ndashimira Imana yonyine, hamwe n’inkotanyi zaturokoye zari ziyobowe na Paul Kagame, uyu n’umunsi mubuzima bwange nongeye kumva ko ndiho ,hashimwe abavandimwe batwubakiye byari bigoye ariko Imana yabagiye imbere inzu yuzuye mu mahoro ,Amena”.
Athanasia, we yavuze ko, ashimira cyane ubuyobozi bw’umurenge wa Kigarama, kuko bakomeje kubaba hafi, Ati:”Ndashimira Gitifu w’umurenge wacu Umubyeyi Mediatrice ,aba hafi cyane abarokotse Jenoside yakorewe abatutsi, umutima mwiza atwereka Imana izawumuhembere ntayandi mashimwe dufite tuzahora tumusabira ku mana imugende imbere mu kazi akora”.
