ACP Rutagerura yagizwe Umuyobozi w’Ibikorwa bya Polisi mu butumwa bw’Amahoro muri Sudani y’Epfo
Uwari Umuyobozi Mukuru wa Polisi mu Mujyi wa Kigali, ACP Felly Bahizi Rutagerura, yatangiye inshingano nk’Umuyobozi Mukuru ushinzwe ibikorwa by’Abapolisi bari mu butumwa bw’Umuryango w’Abibumbye muri Sudani y’Epfo.
Ni umwanya ACP Rutagerura asimbuyeho Umunya-Ghana, Francis Yiribaare, wasoje manda ye ku buyobozi bw’ibikorwa by’Abapolisi bari mu butumwa bw’amahoro muri iki gihugu.
Izi nshingano yazihawe kuri uyu wa 17 Kanama 2022 ku cyicaro gikuru cy’abari mu butumwa bw’amahoro i Juba mu muhango witabiriwe n’Umuyobozi Mukuru w’Abapolisi bari mu butumwa bw’amahoro muri iki gihugu, Christine Fossen n’Umuyobozi wungirije w’Ishami rishinzwe umutekano muri Loni, Rajender Pal Upadhyaya.
Fossen Christine yagaragarije uyu muyobozi mushya ugiye gukurikirana ibikorwa by’abari mu butumwa bw’amahoro muri Sudani y’Epfo uko umutekano muri iki gihugu wifashe n’ibyo agomba kwibandaho.
Nyuma yo guhabwa izi nshingano ACP Rutagerura yatangaje yiteguye kuzikora mu buryo bwiza mu rwego rwo guharanira kugarura amahoro n’umutekano birambye ku baturage ba Sudani y’Epfo.
