Musanze:Abaturage bahangayikishijwe no kubura serivise mu nzego z’ibanze -Abayobozi bagera mu kazi amasaha bishakiye
Bamwe mu baturage mu karere ka Musanze, bari gutaka kubura serivise mu nzego z’ibanze barashinja abayobozi kugera mu kazi ku masaha bishakiye bigatuma birirwa ku biro babuze uwabafasha.
Urugero rwaho umunyamakuru yageze kuri uyu wa 1/8//2022 asanga abaturage bari ku kagali gafunze kandi amasaha ya kazi yarenze n’akagari ka Bikara ,umurenge Nkotsi.
Hari saa mbiri n’iminota 45 za mu gitondo , abaturage bari hanze y’ibiro bifunze bagize bati:”Mutuvuganire abayobozi bacu bagera mu kazi ku masaha bishakiye, hari ubwo Gitifu atugeraho saa sita, iyo turambiwe hari ubwo twitahira kubera na telefoni aba yayifunze”.
Ahandi umunyamakuru yageze ni mu kagari ka Kabeza, mu murenge wa Cyuve, hari abaturage bari buzuye ku biro babuze umukozi ushinzwe ubutaka, ubwo yitabaga telefoni saa mbiri n’iminota 30 yababwiye ko yari yagiye mu Misa , abasaba ko baza iwe mu rugo akaba ariho abahereza serivise.
Iyi myitwarire y’aba bayobozi ikomeje kudindiza serivise muri kano karere ka Musanze, abaturage barasaba ko umuyobozi ucyererewe yajya akatwa amafaranga ku mushahara, abadatanga serivise uko bikwiye nk’aba batagera ku biro bakemura ibibazo byabo babasanze mu ngo bakwirukanwa kuko baba badashoboye.
Ramuli Janvier, umuyobozi w’akarere ka Musanze yirinze kugira icyo avuga kuri iki kibazo cy’abayobozi mu mirenge no mu tugari bagera ku kazi ku masaha bishakiye , SMS yahawe ntacyo yabivuzeho kuko atayisubije iminsi ibiri irihiritse yicecekeye na Telefoni y’umunyamakuru yanze kuyitaba kugeze ubwo iyi nkuru isohotse.
Itegeko rivuga ko umukozi wa leta agomba kugera mu kazi mbere ya saa mbiri za mu gitondo. Usibye ko bamwe muri Musanze bahagerera igihe mu kazi ariko ntibatange umusaruro ngo ubasanga hanze y’ibiro bari kwiyotera izuba biganirira ibiganiro birimo imipira na Siporo.
