Mageragere:Abanyamuryango ba FPR-Inkotanyi borojwe Inka, bashimangira ko iterambere rishingiye ku miyoborere ya Paul Kagame
Mu murenge wa Mageragere, akarere ka Nyarugenge, kuri uyu wa 14 Werurwe 2026 hateraniye inteko y’abanyamuryango ba FPR-Inkotanyi, igikorwa cyitabiriwe n’abayobozi batandukanye b’umuryango ku rwego rw’akarere.
Iyi nteko yayobowe na Chairman wa FPR-Inkotanyi ku rwego rw’akarere ka Nyarugenge, Bwana Ingangare Alexis, ikaba yaranzwe n’ibiganiro byagarutse ku ruhare rw’abanyamuryango mu kubaka igihugu no gukomeza gusigasira ibyagezweho.
Mu ijambo rye, Ingangare Alexis yashimiye ubutwari n’uruhare byaranze Inkotanyi mu guharanira kubohora igihugu no kugiteza imbere. Yagaragaje ko byinshi mu byo abanyarwanda baharaniraga byagezweho, asaba abaturage gukomeza kubinoza no kubisigasira.
Yagize ati:
“Amashuri, amavuriro, imihanda, ubucuruzi ndetse n’umutekano byose turabifite. Ibisigaye ni twe dukwiye kubinoza no kubisigasira kugira ngo bikomeze kutugirira akamaro.”
Uyu muhango wanaranzwe n’igikorwa cyo kuroza bamwe mu banyamuryango inka, muri gahunda ya Girinka yashyizweho na Perezida wa Repubulika akaba na Chairman wa FPR-Inkotanyi, Paul Kagame, igamije guteza imbere imibereho myiza y’abaturage no kubafasha kwiteza imbere.
Mu bahawe inka harimo Buregaye Augustin, utuye mu kagari ka Runzenze, umudugudu wa Mpanga, worojwe inka na Izabiriza Constasian, utuye mu kagari ka Nyarufunzo, umudugudu wa Maya.
Aganira na HANGA NEWS, Buregaye Augustin yashimye iki gikorwa avuga ko kizamufasha mu kwiteza imbere no kuzamura imibereho y’umuryango we.
Na we Izabiriza Constasian waremeye mugenzi we inka yavuze ko gahunda yo gufashanya hagati y’abanyamuryango ari imwe mu ndangagaciro zikomeye z’umuryango, anashimangira ko ibyo byose bishingiye ku miyoborere myiza ya Perezida Paul Kagame.
Abitabiriye uyu muhango bagaragaje ko ibikorwa nk’ibi bikomeza gushimangira ubumwe n’ubufatanye hagati y’abanyamuryango ba FPR-Inkotanyi, ndetse bikagira uruhare mu guteza imbere imibereho myiza y’abaturage.
Iyi nteko yasojwe abanyamuryango basabwa gukomeza kugira uruhare mu bikorwa by’iterambere no gukomeza gusigasira ibyagezweho mu miyoborere y’igihugu.
Bamwe mu banyamuryango baturutse Nyarufunzo bari mu byishimo.
Habayeho umwanya wo kungurana ibitekerezo.
