#Kwibuka32: Ishuri Saint Nicolas mu rugendo rwo kubaka urubyiruko ruzira ingengabitekerezo ya Jenoside

Ishuri Saint Nicolas ryibutse ku nshuro ya 32 Jenoside yakorewe Abatutsi, risura Urwibutso rwa Rwampala. N’igikorwa cyabaye kuri uyu wa 29/5/2026.

Ishuri Saint Nicolas, riherereye mu murenge wa Nyamirambo, akarere ka Nyarugenge ryifatanyije n’Abanyarwanda mu bikorwa byo Kwibuka ku nshuro ya 32 Jenoside yakorewe Abatutsi mu 1994, mu gikorwa cyaranzwe no gusura Urwibutso rw’Ikimenyetso cy’Amateka ya Jenoside yakorewe Abatutsi rwa Rwampala, hagamijwe guha abanyeshuri n’abakozi b’iri shuri umwanya wo kumenya amateka no gukomeza urugendo rwo kurwanya ingengabitekerezo ya Jenoside.

Iki gikorwa cyabaye mu rwego rwo gukomeza kwimakaza umuco wo kwibuka no gusigasira amateka, aho ubuyobozi bw’ishuri, abarimu, abanyeshuri ndetse n’abakozi baryitabiriye ku bwinshi.

Mu rugendo rwo gusura Urwibutso rwa Rwampala, abaryitabiriye basobanuriwe amateka yaranze Jenoside yakorewe Abatutsi muri aka gace, uburyo yateguwe ikanashyirwa mu bikorwa, ndetse n’ingaruka zikomeye yasize ku Banyarwanda. Basobanuriwe kandi uruhare rwa buri wese mu kubungabunga amateka no kurwanya ibikorwa byose bishobora guteza amacakubiri n’urwango.

Ubuyobozi bw’Ishuri Saint Nicolas bwagaragaje ko kwibuka Jenoside yakorewe Abatutsi atari ugusubira mu mateka y’agahinda gusa, ahubwo ari umwanya wo kuzirikana amasomo igihugu cyavanye muri ayo mateka no gukomeza kubaka ejo hazaza harangwa n’ubumwe, ubwiyunge n’iterambere.

Mu butumwa bwatangiwe muri iki gikorwa, abanyeshuri basabwe gukura amasomo mu mateka y’u Rwanda, bakarangwa n’indangagaciro z’ubumuntu, gukunda igihugu no kugira uruhare mu kubaka sosiyete itarangwamo ivangura iryo ari ryo ryose.

Bamwe mu banyeshuri bitabiriye uru rugendo bavuze ko gusura urwibutso byabafashije kurushaho gusobanukirwa amateka ya Jenoside yakorewe Abatutsi no kumva inshingano bafite zo kuyasigasira no kuyageza ku bazabakurikira.

Iki gikorwa cyabimburiwe no gushyira indabo ku rwibutso no gufata umunota wo kwibuka no guha icyubahiro inzirakarengane zazize Jenoside yakorewe Abatutsi. Nyuma yaho hakurikiye ibiganiro byibanze ku mateka ya Jenoside, urugendo rwo kubohora igihugu ndetse n’uruhare rw’urubyiruko mu kurinda ibyagezweho.

Kwibuka ku nshuro ya 32 Jenoside yakorewe Abatutsi bikomeje kubera Ishuri Saint Nicolas umwanya wo kongera gushimangira indangagaciro zo kubaha ubuzima bwa muntu, kwimakaza ubumwe n’ubwiyunge no guharanira ko Jenoside itazongera kubaho ukundi haba mu Rwanda cyangwa ahandi hose ku isi.

“Kwibuka ni inshingano ya buri Munyarwanda; ni ugusigasira amateka, guha icyubahiro abazize Jenoside no kubaka ejo hazaza heza harangwa n’amahoro n’ubumwe.”