Umurenge wa Rwezamenyo wibutse ku nshuro ya 32 Jenoside yakorewe Abatutsi mu 1994
Rwezamenyo, Nyarugenge – Abaturage b’Umurenge wa Rwezamenyo n’abayobozi mu nzego zitandukanye bahuriye mu gikorwa cyo kwibuka ku nshuro ya 32 Jenoside yakorewe Abatutsi mu 1994, bagaragaza umuhate wo gukomeza kuzirikana amateka no kurwanya ingengabitekerezo ya Jenoside.
Iki gikorwa cyatangijwe no gusura Kigali Genocide Memorial, aho abayitabiriye bunamiye inzirakarengane ziruhukiye muri uru rwibutso banashyira indabo ku mva zishyinguyemo imibiri y’abazize Jenoside yakorewe Abatutsi.
Mu bitabiriye iki gikorwa harimo Emmanuel Havugimana, Visi Meya ushinzwe Imibereho Myiza y’Abaturage mu Karere ka Nyarugenge, Urujeni, Umuyobozi Nshingwabikorwa w’Akarere ka Nyarugenge Alexis Ingangare, abagize inzego z’umutekano, abayobozi b’inzego z’ibanze ndetse n’abaturage bo mu Murenge wa Rwezamenyo.
Abitabiriye igikorwa bibukijwe amateka ya Jenoside yakorewe Abatutsi mu 1994, basabwa gukomeza kubungabunga ukuri ku byabaye no gufata iya mbere mu guharanira ubumwe n’ubudaheranwa by’Abanyarwanda.
Mu butumwa bwatanzwe, hibanzwe ku gushimangira akamaro ko kwigisha urubyiruko amateka y’igihugu kugira ngo Jenoside itazongera kubaho ukundi.
Hanagarutswe ku rugendo rw’u Rwanda rwo kwiyubaka nyuma ya Jenoside, rwashobotse kubera ubuyobozi bwiza, ubumwe bw’Abanyarwanda n’uruhare rw’abaturage mu kubaka igihugu.
Abayobozi bitabiriye iki gikorwa bashimye intambwe imaze guterwa mu kubungabunga amateka no kwita ku barokotse Jenoside yakorewe Abatutsi, banasaba abaturage gukomeza kurwanya ingengabitekerezo ya Jenoside n’ibindi bikorwa byose bishobora guhungabanya ubumwe bw’Abanyarwanda.
Kwibuka ku nshuro ya 32 Jenoside yakorewe Abatutsi mu 1994 ni umwanya wo guha icyubahiro inzirakarengane zazize Jenoside, gufata mu mugongo abayirokotse no kongera kwiyemeza kubaka u Rwanda ruzira amacakubiri, rushingiye ku bumwe, ukuri n’ubudaheranwa.
“Twibuke twiyubaka” ni yo nsanganyamatsiko ikomeje kuyobora ibikorwa byo kwibuka, igamije gushimangira ko kwibuka ari inshingano za buri Munyarwanda mu rugendo rwo kubaka ejo hazaza heza h’igihugu.
