Umujyi wa Kigali watangaje ko wabaruye abagore barenze 9,000 bakora uburaya – Nyarugenge ku isonga habarurwa abarenga 4,000
Umuyobozi Wungirije w’Umujyi wa Kigali ushinzwe Imibereho Myiza y’Abaturage, Urujeni Martine, yatangaje ko abagore bakora uburaya mu Mujyi wa Kigali bamaze kurenga 9000, agaragaza ko ari ikibazo gikomeye gishingiye ahanini ku mibereho y’imiryango n’uburere.
Ibi yabigarutseho ku wa 29 Werurwe 2026 mu nama y’Inteko Rusange y’Umuryango FPR Inkotanyi yabereye mu Karere ka Nyarugenge, aho yibukije ko gukemura iki kibazo bisaba kubanza gusana umuryango nyarwanda.
Yagize ati: “Mu turere dutatu tw’Umujyi wa Kigali abakora uburaya twasanze barenga 9000, muri bo abarenga 4000 ni abo mu Karere ka Nyarugenge. Ni ikibazo usanga gishingiye ku burere kuko umubyeyi adashobora gutanga icyo adafite.”
Imibare igaragaza ko uyu mubare wazamutse uvuye ku barenga 7000 bari babaruwe mu 2022, bigaragaza ko hakiri urugendo rurerure mu gukumira iki kibazo.
Abatangabuhamya: “Tubiterwa n’ubukene n’imibereho mibi”
Bamwe mu bakora uburaya mu Karere ka Nyarugenge, bavuganye na HANGA NEWS uyu wa 30/3/2026 cyane cyane mu duce tuzwi nka Cosmo’s, bavuga ko impamvu nyamukuru ibibatera ari ubukene n’imibereho mibi ibabana n’umunsi ku wundi.
Umwe muri bo utifuje ko amazina ye atangazwa, yavuze ko yinjiye muri uyu mwuga nyuma yo kubura akazi no kubura uko abaho.
Yagize ati: “Naje i Kigali nshaka akazi ariko ndakabura. Ubuzima bwaje kungora, mbura aho kuba n’icyo kurya, mpitamo kujya muri ibi kugira ngo mbone uko mbaho. Si uko mba mbishaka, ni uko nta kundi byagenda.”
Undi na we yagize ati: “Abantu benshi badutekereza nabi, ariko ntibazi ubuzima tuba turimo. Iyo nta bushobozi ufite, nta n’umuryango ugufasha, biragorana. Hari ababyeyi barera abana bonyine, bagahitamo gukora ibi kugira ngo babone amafaranga y’ishuri n’ibyo kurya.”
Bavuga ko nubwo bazi ingaruka z’uyu mwuga, harimo iz’ubuzima ndetse n’umutekano, kubivamo bitoroshye kubera ko nta yandi mahirwe bafite.
Hakenewe ibisubizo birambye
Ubuyobozi bw’Umujyi wa Kigali bugaragaza ko gukemura iki kibazo bidakwiye gushingira gusa ku kubuza no guhana, ahubwo bikwiye no gushyira imbaraga mu guteza imbere imibereho myiza y’abaturage, guhanga imirimo, no kwigisha indangagaciro z’umuryango.
Abitabiriye iyi nama basabye ko hashyirwa imbaraga mu gufasha urubyiruko kubona imirimo no kwihangira imirimo, ndetse no kwegera imiryango ifite ibibazo kugira ngo ifashwe kubaka ubuzima burambye.
Ibi byose bigamije kugabanya umubare w’abishora mu buraya, no kubaka umuryango uhamye ufite ubushobozi bwo kurera neza no guha amahirwe angana ku bawugize.
