RDB YONGEREYE AMASAHA Y’UTUBYINIRO, UTUBARI NA RESITORA MU MINSI MIKURU ISOZA UMWAKA
Urwego rw’Igihugu rw’Iterambere (RDB) rwatangaje ko mu rwego rwo kwishimira no gufasha Abanyarwanda n’abashyitsi kwizihiza iminsi mikuru isoza umwaka, hafashwe icyemezo cyo kongera amasaha ya serivisi zitangwa mu ijoro, zirimo utubari, utubyiniro na resitora.
Mu itangazo RDB yashyize ahagaragara kuri iki Cyumweru tariki ya 21 Ukuboza 2025, yemeje ko ayo mabwiriza atangiye kubahirizwa ku wa Mbere tariki ya 22 Ukuboza 2025, akazakomeza kugeza tariki ya 5 Mutarama 2026.
Nk’uko byatangajwe, kuva ku wa Mbere kugeza ku wa Kane, ibikorwa by’iyo mibyizi bizajya bifunga saa cyenda z’ijoro.
Mu gihe ku wa Gatanu, ku mpera z’icyumweru ndetse no ku minsi y’ikiruhuko, serivisi zizajya zitangwa amasaha 24 kuri 24, hagamijwe gutuma abantu bishimira iminsi mikuru mu bwisanzure.
RDB yasabye abakora muri izo nzego gukomeza kubahiriza amategeko n’amabwiriza agenga umutekano, isuku n’imyitwarire myiza, anashishikariza abakiriya kwitwararika no kwirinda imyitwarire ishobora guhungabanya umutekano.
Iki cyemezo kije gikomeza gushyigikira iterambere ry’urwego rw’ubukerarugendo n’imyidagaduro, ari nako gifasha ubukungu bw’igihugu muri ibi bihe by’iminsi mikuru.
