Ishuri rya Camp Kigali rigiye kubakwamo ibikorwaremezo bya Siporo Kubufatanye bwa FERWAFA na IMPEESA

Uyu munsi Tariki ya 31/1/2024 , President wa FERWAFA Munyentwali Alphonse ari kumwe n’Umunyamabanga Mukuru Kalisa Adolphe, hari Kandi n’umunyamabanga Nshingwabikorwa w’umurenge wa Nyarugenge Madame Murekatete Patricia uyobora umurenge iri shuri ryubatsemo, bose basuye ishuri rya G.S Camp Kigali hagamijwe kureba ibikorwaremezo bya siporo na gahunda yo guteza imbere impano z’abana mu bufatanye bwa G.S Camp Kigali school na IMPEESA.

Munyentwali Alphonse, yabwiye HANGA NEWS ko ,uyu munsi bari mu ishuri rya G.S Camp Kigali hagamijwe Gusura no kungurana ibitekerezo ku gikorwa iri shuri rifitanye na IMPEESA ryo kubaka ibikorwaremezo bya Siporo. Ati:”Turi hano tugamije gutanga umunzu wacu mu bikorwa byiza byo kubaka ibikorwaremezo bya Siporo biri imbere hano muri Camp Kigali, twaganiriye n’ubuyobozi bw’ishuri na IMPEESA kuko n’umunyamuryango wacu, hari byinshi twunguranyeho ibitekerezo muri uyu mushinga Kandi tunabizeza ubufatanye n’ubuvugizi kuko ibi bikorwa bigiye kubakwa hano bizasaba ubushobozi bw’amafaranga menshi”.

Uyu muyobozi yaboneyeho no kuganiriza bamwe mu banyeshuri , aho yabasabye ko batazarangara mu gihe bazaba bamaze kubona ibibuga bigezweho by’imyidagaduro , Ati:”Hano mu gihe kiri imbere ,muraba mufite ibibuga bigezweho bya Siporo, abakina Football ntimuzarangare ngo mushyire imbaraga mu kupira kuko byose bigomba kugendana n’ishuri, mube beza mu mupira no mu masomo mutsinda nibyo tubifuzaho”.

Niyonsenga Jean de Dieu, umuyobozi w’ishuri rya Camp Kigali , yabwiye HANGA News ko , bashimira abafatanyabikorwa batekereje ku bana basaga ibihumbi bitatu na maganatanu biga muri camp Kigali (3,500) , Ati:”Nibyo gushima no gushimira ubuyobozi Bwiza bw’igihugu, kuko aba bana bacu bafite impano za Siporo zitandukanye, kuba bagize amahirwe yo kubona ibibuga bakiniraho bizatuma barushaho kwigaragaza mubyo bashoboye”.

Yakomeje, avuga ko nubwo ibikorwaremezo bya Siporo bizaba birangiye kubakwa , Atari ibyo kurangaza abana ngo bumve ko ishuri barireka, Ati:”Hoya, siko bizagenda dusanzwe tugira umwanya wa Siporo n’imyidagaduro , icyo dushyize imbere n’amasomo Kandi ni nabyo tuzakomeza kubwira abana ko udashoboye amasomo n’umupira atawushobora, tuzabihuza kuburyo byose bizatanga umusaruro ufatika Kandi twitezeho ko bizagirira akamaro abana bacu, ababyeyi n’igihugu muri rusange”.

Yosoje ,ashimira ababyeyi barerera muri Camp Kigali, anabasaba kuba hafi y’abana cyane babagurira imyenda ya Siporo n’inkweto ,Ati:”Nibyo? umuterankunga azatwishyurira umuganga uzajya akurikirana ubuzima bw’abana ,ibikoresho bya Siporo n’ibindi ?? ariko ababyeyi nabo bamenye ko bafite uruhare rukomeye rwo kwita kuburere bw’umwana, ndabyizeye kuko dufatanya muri byinshi n’ubu uruhare rwabo muri iki gikorwa ruzaba runini”.

Ibikorwaremezo bigiye kubakwa bizaba bigizwe, n’ikibuga kinini cya Football, na Mini football, Basketball, Volleyball na Tennis.

Igishushanyo mbonera cyerekana uburyo iki kibuga kigiye kubakwa muri Camp Kigali kizaba giteye.

Hazubakwa n’ibibuga bito (Mini Football).

Hazubakwa na parking z’imodoka.

Umuyobozi w’ishuri rya Camp Kigali Niyonsenga Jean de Dieu ubwo yakiraga abayobozi mu biro bye.

Banasuye umuyobozi wa IMPEESA.

Basuye n’abanyeshuri barimo gukora Siporo baranabaganiriza.