Inteko y’Umujyi wa Kigali yibanze ku isuku, imiyoborere n’imyiteguro y’amatora y’inzego z’ibanze

Umuyobozi w’Umujyi wa Kigali yasabye abayobozi kongera imbaraga mu isuku, kurwanya akajagari no guhashya inzoga zitujuje ubuziranenge.

Kigali – Umuyobozi w’Umujyi wa Kigali, Samuel Dusengiyumva, yasabye abayobozi bo mu nzego zitandukanye z’Umujyi wa Kigali gushyira imbaraga mu kubungabunga isuku, kurwanya imyubakire y’akajagari no guca burundu inzoga zitujuje ubuziranenge, ashimangira ko ibyo ari bimwe mu bizafasha kurushaho guteza imbere imibereho myiza y’abaturage n’iterambere rirambye ry’umujyi.

Yabigarutseho mu Nteko ngarukamwaka y’Umujyi wa Kigali yahuje abayobozi kuva ku rwego rw’Akagari kugeza ku buyobozi bw’Umujyi, hamwe n’abafatanyabikorwa batandukanye, hagamijwe gusuzuma ibikorwa byagezweho no kurebera hamwe gahunda z’ibanze zizashyirwa mu bikorwa mu mwaka utaha.

Mu butumwa bwe, Dusengiyumva yagaragaje ko isuku ari inkingi y’ubuzima bwiza n’ishusho y’umujyi, asaba abayobozi gukomeza gukorana bya hafi n’abaturage kugira ngo ibikorwa byo kubungabunga isuku birusheho kunozwa.

Yanibukije abayobozi gukaza ingamba zo kurwanya imyubakire y’akajagari, hubahirizwa amategeko agenga imyubakire n’igenamigambi ry’Umujyi wa Kigali, ndetse no gukomeza ibikorwa byo kurwanya inzoga zitujuje ubuziranenge, zibangamira ubuzima bw’abazinywa n’umutekano rusange.

Abitabiriye iyi nteko baganiriye kandi ku myiteguro y’amatora y’inzego z’ibanze ateganyijwe mu mpera z’uyu mwaka, basobanurirwa uruhare rw’inzego z’ubuyobozi mu gutegura no gufasha ko ayo matora azaba mu mucyo, mu mutekano no mu ituze.

Inama yanagarutse ku cyerekezo cy’Umujyi wa Kigali mu myaka iri imbere, isuzuma gahunda n’ibikorwa by’ingenzi biteganyijwe mu mwaka w’Ingengo y’Imari wa 2026/2027, hagamijwe gukomeza guteza imbere ibikorwa remezo, serivisi zihabwa abaturage no kuzamura imibereho myiza y’abatuye Umujyi wa Kigali.

Abayobozi n’abafatanyabikorwa bitabiriye iyi nteko biyemeje gukomeza gukorera hamwe mu ishyirwa mu bikorwa rya gahunda z’iterambere no kunoza imitangire ya serivisi, hagamijwe kubaka Umujyi wa Kigali urangwa n’isuku, gahunda n’iterambere rirambye.