#Kwibuka32 -Nyamirambo: Hibutswe imiryango yazimye muri Jenoside yakorewe Abatutsi
Umuyobozi w’Umujyi wa Kigali Wungirije ushinzwe Imiturire n’Ibikorwa Remezo, Dusabimana Fulgence, abayobozi b’Akarere ka Nyarugenge District, inzego z’umutekano, abayobozi muri IBUKA ndetse n’abaturage b’Umurenge wa Nyamirambo bifatanyije mu gikorwa cyo kwibuka imiryango yazimye muri Jenoside yakorewe Abatutsi mu 1994.
Iki gikorwa cyabaye mu rwego rwo kuzirikana inzirakarengane z’Abatutsi zishwe Jenoside igahitana imiryango yose, hagamijwe kandi gukomeza gusigasira amateka no guha icyubahiro abazize Jenoside yakorewe Abatutsi.
Abitabiriye iki gikorwa cyo kwibuka Jenoside yakorewe Abatutsi bunamiye abazize Jenoside bashyira indabo ku cyimenyetso cy’urwibutso rwa Jenoside banasabwa gukomeza kurwanya ingengabitekerezo ya Jenoside no guharanira ubumwe bw’Abanyarwanda.
Mu butumwa bwatangiwe muri iki gikorwa, hibukijwe ko kwibuka ari umusingi wo kubaka ejo hazaza heza hadashingiye ku macakubiri n’urwango, ahubwo hubakiye ku bumwe, ubwiyunge n’iterambere ry’Abanyarwanda bose.
Abayobozi bitabiriye iki gikorwa bashimangiye ko Jenoside yakorewe Abatutsi ari amateka igihugu kitazigera cyibagirwa, basaba urubyiruko gukomeza kwigira ku mateka kugira ngo Jenoside itazongera kubaho ukundi.
Igikorwa cyo kwibuka cyaranzwe n’amasengesho, ubuhamya ndetse n’umwanya wo guha icyubahiro imiryango yazimye muri Jenoside yakorewe Abatutsi mu 1994.
