Abagore bo muri Mageragere basabwe kuzirikana agaciro kabo banirinda amakimbirane mu ngo
Mu Karere ka Nyarugenge, Umurenge wa Mageragere, hizihijwe Umunsi Mpuzamahanga w’Umugore ku nsanganyamatsiko igira iti “Umugore ni uw’agaciro.”
Ni igikorwa cyitabiriwe n’abayobozi batandukanye barimo abadepite bo mu Ihuriro FFRP, abayobozi b’Umujyi wa Kigali ndetse n’ubuyobozi bw’Akarere ka Nyarugenge, ndetse n’inzego z’umutekano, bifatanyije n’abaturage mu guha agaciro uruhare rw’umugore mu iterambere.
Muri aba bayobozi harimo Hon. Alfred Gasana, Visi Meya w’Umujyi wa Kigali, hamwe na Urujeni Martine n’abandi bayobozi bitabiriye uyu muhango wabereye mu Murenge wa Mageragere.
Abagore bamuritse ibikorwa bibateza imbere.
Mu rwego rwo kugaragaza uruhare rw’umugore mu iterambere, abagore bo muri uyu murenge bamuritse ibikorwa binyuranye bakora mu matsinda n’amakoperative. Ibyo bikorwa birimo ubuhinzi n’ubworozi, ubukorikori ndetse n’indi mirimo ibyara inyungu, byose bigamije kwiteza imbere no guteza imbere imiryango yabo.
Abitabiriye uyu muhango bagaragaje ko ibikorwa by’abagore ari inkingi ikomeye mu kuzamura imibereho y’abaturage no kubaka ubukungu bw’imiryango.
Abagore n’abana baremewe.
Uyu munsi wanaranzwe n’igikorwa cyo gufasha abaturage batishoboye, aho abagore n’abana bamwe bahawe inkunga zitandukanye.
Mu bakorewe iki gikorwa harimo abakobwa barenga 15 babyariye iwabo basubijwe mu ishuri, bahawe matera azabafasha gukomeza amasomo yabo. Hari kandi abagore borejwe inka n’amatungo magufi mu rwego rwo kubafasha kwiteza imbere.
By’umwihariko, umwana ufite ubumuga wiga muri ako gace yahawe igare rimufasha kugera ku ishuri. Umubyeyi we yavuze ko iyi nkunga imukuye mu ihurizo rikomeye yari afite.
Yagize ati:
“Buri gitondo namugezaga ku ishuri muhetse mu mugongo, n’igihe atashye nabikoraga. Ubu ndaruhutse. Ndashimira Perezida Paul Kagame ukomeje kuzirikana abaturage tubabaye.”
Abagore basabwe gukomeza kubaka imiryango itekanye
Mu ijambo rye, Hon. Alfred Gasana yibukije abagore ko bafite agaciro gakomeye mu muryango no mu gihugu muri rusange. Yabasabye gukomeza kugira uruhare mu kubaka imiryango itekanye, birinda amakimbirane mu ngo ndetse n’ingeso mbi zirimo ubusinzi bukabije.
Yongeyeho ati:”Kugira ngo igihugu gitere imbere, abagituye bose barimo n’abagore bahabwa amahirwe angana”.
Asoza Ubutumwa bwe, yavuze ko uruhare rw’Abagore ari ingenzi mu kubaka igihugu kuko mu bukungu 78% by’abagore bageze igihe cyo gukora bari mu mirimo
Yashimangiye ko uburinganire n’ubwuzuzanye hagati y’umugabo n’umugore ari inkingi ikomeye y’iterambere ry’umuryango n’igihugu.
Gusura ibikorwa by’abagore
Umuhango wasojwe n’igikorwa cyo gusura ibikorwa bitandukanye by’abagore bari baje kumurika, aho abayobozi n’abaturage bishimiye intambwe abagore bagezeho mu bikorwa by’iterambere.
Iki gikorwa cyagaragaje ko abagore bo mu Murenge wa Mageragere bakomeje gutera imbere mu bikorwa bibateza imbere, kandi ko bafite uruhare rufatika mu guteza imbere imibereho y’imiryango yabo n’akarere muri rusange.
