Nyarugenge: HIGH SEC Ltd irasaba ubufatanye bw’inzego z’ibanze mu kunoza isuku mu gace ka Nyabugogo

Kampani ya HIGH SEC Ltd, ishinzwe isuku ikorerwa mu nzu z’inkundamahoro n’amashyirahamwe yo mu gace ka Nyabugogo, mu murenge wa Kimisagara, akarere ka Nyarugenge, iravuga ko hakiri imbogamizi ziterwa n’abacuruzi n’abaturage bamwe banangira gutanga umusanzu w’isuku, bikabangamira ireme ry’akazi kabo.

Ubuyobozi bwa HIGH SEC Ltd buvuga ko isuku irambye itagerwaho mu gihe hari abigira indakoreka, bakanga gufatanya n’abashinzwe isuku. Bugaragaza ko kudatanga umusanzu bituma kampani idashobora kwishyura abakozi bayo barenga 2000, kugura ibikoresho bigezweho ndetse no kubona mazutu ikoreshwa n’imodoka zitwara imyanda.

Umuyobozi muri HIGH SEC yagize ati:
“Nta suku yaboneka mu gihe hari abatinangira gutanga umusanzu. Ntitwashobora gukomeza gutanga serivisi nziza mu gihe tutishyurwa, nyamara tugomba kwita ku bakozi, ibikoresho n’ibinyabiziga dukoresha.”

Abaturage bo mu gace ka Nyabugogo baganiriye na HANGA NEWS ku wa 9 Mutarama 2026, bagaragaje ko imyitwarire mibi ya bamwe mu bacuruzi ibangamira isuku rusange ndetse ikagira ingaruka ku isura y’umujyi wa Kigali.

Umwe muri bo yagize ati:

“Ntabwo twakorera ahantu hari umwanda. Nyabugogo ni irembo ry’Umujyi wa Kigali, bityo isuku ihoraho ni ngombwa. Abangiza isuku bagomba kwigishwa akamaro kayo cyangwa inzego zibishinzwe zigafatiraho ingamba.”

Umujyi wa Kigali washyize isuku n’umutekano mu nkingi za mwamba z’iterambere ry’abaturage n’isura y’umurwa mukuru. Kuba Nyabugogo, nk’irembo ry’umujyi, yagirwa indiri y’umwanda byaba bibabaje kandi bihabanye n’icyerekezo cy’umujyi.

HIGH SEC Ltd isaba ko ubuyobozi bw’Umurenge wa Kimisagara n’Akarere ka Nyarugenge bwafatanya na bo mu gukangurira abaturage n’abacuruzi kubahiriza inshingano zabo, hagamijwe isuku irambye kandi itangirwa ku gihe, kuko nk’uko babyemeza, “ntibashobora gukorera mu gihombo.”

Ubufatanye bw’inzego zose bureba isuku burasabwa nk’inzira yonyine yatuma Nyabugogo ikomeza kuba ishema ry’Umujyi wa Kigali, aho abahagenda bose bahasanga isuku, umutekano n’isura nziza y’igihugu.

Bamwe mu baturage High Sec igaragaza mu gace ka Nyabugogo bakora Ibikorwa bagasiga umwanda aho bakoreye. Bikaba ihurizo kuri kuko batishyura umusanzu w’isuku.

Aba ni bamwe mu baturage High Sec igaragaza ko banyara aho babonye mu mihanda ya Nyabugogo,bahanganye nabo. Bisaba ko hakorwa ubufatanye n’inzego z’umutekano bigacika.

High Sec ivuga ko , yashyizeho abakozi barenga 200 bashinzwe isuku mu gace bakoreramo mu rwego rwo kwimakaza isuku.

Bavuga ko , ubufatanye n’inzego z’ibanze ari ngombwa kubera ko nabo batabona uko bishyura aba bakozi mu gihe barimo gukorera mu bihombo.

High Sec ivuga ko yashyizeho abasekirite hose mu rwego rwo kurwanya abakora ubucuruzi butemewe mu nzu z’Inkundamaho n’Amashyirahamwe. (abazunguzayi).

High Sec ivuga ko ifite ubushake n’imbaraga zo kucunga umutekano no gukora isuku isabwa mu gace ka Nyabugogo.