Kicukiro:Nasabye abayobozi kunoza ishyirwa mu bikorwa ry’imihigo – Vice Meya Dr Merard
Umuyobozi w’Umujyi wa Kigali wungirije ushinzwe imiturire n’ibikorwa remezo Merard Mpabwanamaguru yifatanije n’Ubuyobozi bw’Akarere ka Kicukiro ndetse n’abakozi b’Akarere mu muhango wo gusinya imihigo y’umwaka w’Imihigo wa 2023-2024 .
Bamwe muri ba Gitifu basinya imihigo .
Iyo mihigo yasinywe na ba Rushingwangerero , Abanyamabanga Nshingwabikorwa b’Imirenge ndetse n’abahagarariye ibindi byiciro barimo abahagarariye Minisiteri y’urubyiruko ndetse na Minisiteri y’uburinganire n’iterambere ry’umugore.
Umuyobozi Nshingwabikorwa w’Akarere Mutsinzi Anthoine yashimye uburyo abakozi b’Akarere bashoboye kwesa imihigo y’umwaka ushize , ikaba yareshejwe ku kigero cya 97%, iyi mihigo ikaba yari ikubiye mu byiciro bitandukanye harimo: Ubukungu, Imibereho myiza ndetse n’imiyoborere myiza.
Biyemeje kuzesa iyi mihigo 💯.
Yasabye by’umwihariko Abanyamabanga Nshingwabikorwa b’Imirenge n’Utugali kurushaho kumenya abaturage bayoboye ,imibereho yabo ndetse n’ibibazo bibugarije kugira ngo bamenye ibikenewe gushyirwamo imbaraga kurusha ibindi.
Biyemeje ko bazanoza isuku.
Mu ijambo rye Vice Meya Merard ari nawe mushyitsi mukuru muri uyu muhango, yibukije ko kwesa Imihigo bisaba uruhare rwa buri wese ndetse n’ubufatanye bw’inzego, yasabye abakozi kongera kwiyibutsa Inshingano zabo uko zateganijwe kuko bibarinda guhuzagurika mu kazi.
Bitabiriye gusinya imihigo ari benshi.
Mu kiganiro na HANGA NEWS, Vice Meya Merard yagize ,ati:” Ubutumwa nyamukuru ni ukunoza ishyirwa mu bikorwa ry’imihigo, umuturage akagira uruhare kandi akishimira ibyagezweho, kunoza imitangira ya serivisi, kwita ku isuku duhereye aho dukorera ku tugali, imirenge n’akarere. Kumenya umuturage w’amikoro make tukamuzamura, gushyira ingufu muri Gahubda y’Akaramata kugira ngo twubake umuryango utekanye, utera imbere, utabamo intonganya kandi abana bakitabira ishuli”.
Umushyitsi mukuru.
Yakomeje ,avuga ko yasabye abayobozi mu nzego z’ibanze kugira Gahunda y’akazi y’icyumweru n’iyu kwezi, raporo zitangwa zikaba zigaragaza aho bageze bashyira mu bikorwa imihigo ndetse banagaragaza icyo iri kumarira abaturage.
