Imirire mibi n’igwingira mu bana bato bigiye kuba amateka i Gitega: Abagore ba FPR-INKOTANYI bafashe icyemezo gikomeye mu nteko rusange
Inteko rusange y’Urugaga rw’Abagore rushamikiye ku muryango FPR-Inkotanyi mu Murenge wa Gitega, akarere ka Nyarugenge yateranye ku wa 3 Gicurasi 2026, igamije gusuzuma ibyagezweho no gufata ingamba nshya zigamije iterambere ry’abaturage n’imibereho myiza y’abagore n’imiryango muri rusange.
Mu ngingo zaganiriweho, hibanzwe ku isesengura ry’ibikorwa byagezweho mu gihe gishize, aho abagore bagaragaje uruhare rukomeye bagize mu guteza imbere imibereho myiza y’abaturage, by’umwihariko mu kurwanya ibibazo byugarije imiryango.
Mu myanzuro yafatiwe muri iyi nteko rusange, abagore biyemeje kongera imbaraga mu bikorwa bitandukanye birimo:
Gukomeza guharanira ko ikibazo cy’imirire mibi n’igwingira mu bana bato,kiranduka burundu, hagamijwe kugera ku kigero cya 0%.
Gukora ubukangurambaga bwimbitse ku bwitabire bwa Mutuelle de Santé, ku buryo buzagera ku kigero cya 100%.
Gufatanya n’izindi nzego mu kurwanya ikibazo cy’abana bata ishuri, buri mwana wese akabona uburenganzira ku burezi.
Guteza imbere umuco w’isuku n’isukura mu midugudu yose igize umurenge.
Gushyigikira gahunda ya “100 Women” igamije gufasha abagore bafite ubucuruzi buto kubona ibishoro, bityo bakiteza imbere mu bukungu. Aho baremeye umukecuru ibihumbi 1000 mu rwego rwo kumufasha gutera intambwe mu kwigira no kwishakamo ibisubizo.
Abitabiriye iyi nteko bagaragaje ko bafite ubushake n’icyizere cyo gushyira mu bikorwa izi ngamba, bemeza ko zizagira uruhare rukomeye mu kuzamura imibereho myiza y’abaturage bo mu Murenge wa Gitega.
Iyi nteko rusange yagaragaje ko uruhare rw’abagore rukomeje kuba inkingi ya mwamba mu iterambere ry’igihugu, cyane cyane mu gushyigikira gahunda za Leta zigamije imibereho myiza n’iterambere rirambye.
