Ukwezi kwahariwe Umujyanama: Umurenge wa Nyarugenge Ubukangurambaga ku isuku no kurwanya igwingira ry’abana byakomereje Rwampara
Tariki ya 7/3/2024 nibwo Nzeyimana Meddy , Perezida wa Jyanama y’umurenge wa Nyarugenge, ari kumwe n’umunyamabanga Nshingwabikorwa w’umurenge Madamu Murekatete Patricia, inzego z’umutekano n’abaturage muri rusange, bazindukiye mu muganda w’isuku batangiza ibikorwa byahariwe ukwezi k’umujyanama, byatangiriye mu kagari ka Biryogo aho bibanze mu gusukura ruhurura no gutoragura iyarara mu mihanda itandukanye yo mu Biryogo.
Uyu wa 14/3/2023 , Ubukangurambaga bwakomereje mu kagali ka Rwampara, aho abayobozi mu kagali bifatanyije n’abaturage bakoze umuganda w’isuku bibanze gutoragura uducupa , imyanda byandagaye muri ruhura bitewe n’imvura yaguye.
Gitifu w’akagari ka Rwampara, Jacques Munyaneza, yabwiye HANGA News ko uyu munsi nta gishya kindi bakoze , bitari muri gahunda y’ibikorwa byateganyijwe gukorwa mu Kwezi kwahariwe umujyanama, ati:”Twakoze isuku nkuko bisanzwe, dutedura indyo yuzuye tugaburira abana mu rwego rwo gukomeza guhangana n’ikibazo cy’igwingira ry’abana bato, ubundi tuboneraho no gutanga ubutumwa kuko byahurijwe hamwe n’inteko y’abaturage nubwo imvura yatuvangiye ubundi byose byagenze neza”.
Murekatete Patricia,Gitifu wa Nyarugenge ubwo yatangizaga ubu bukangurambaga yabwiye HANGA News ko , ukwezi kwahariwe Umujyanama bateguye ibikorwa bitandukanye cyane ibikora ku buzima bw’umuturage aho atuye, ati:”Ubu twahereye Biryogo, tuzakomereza no mutundi tugari twose , dufite gahunda yo gukangurira abaturage kugira isuku ku mubiri, mu ngo zabo, cyane tuzibanda kwigisha ababyeyi guteka indyo yuzuye mu rwego rwo gukomeza kurwanya igwingira ry’abana bato ”.
Twababwira ko ibi bikorwa byahariwe ukwezi ku umujyanama mu murenge wa Nyarugenge, byatangiye Tariki ya 7/3/2023 bikazarangira Tariki 28/3/2023 bazengurutse utugari twose, Bahereye Biryogo, ubu byakozwe muri Rwampara, ubutaha ni Agatare na Kiyovu, HANGA News tuzakomeza kubibagezaho byose…..
Abaturage bazindukiye mu muganda w’isuku.
Abayobozi bafatanyije n’abaturage gutoragura iyarara, uyu ni Gitifu w’akagari Jacques ari muri ruhurura.
Abaturage bari gutoragura uducupa twamanuwe n’umuvu w’amazi.
Abakoze umuganda bari bahagarikiwe na SEDO.
Nyuma y’umuganda habayeho ibiganiro.
Abana bahawe indyo yuzuye.
Aho nteko y’abaturage yabereye.
Inteko yasojwe umushyitsi mukuru abashimira ubwitabire.
