Bugesera: Abagenzi birinubira umusoro wa buri munsi bacibwa nk’ikiguzi bishyura umuhanda bacamo mu gishanga cya Nyamugerera

Abaturage baturiye umuhanda uca mu gishanga cya Nyamugerera, uhuza umurenge wa Mwogo n’umurenge wa Ntarama mu karere ka Bugesera, barinubira amafaranga bacibwa n’abantu bishyize hamwe bashinga koperative bise “Huguka Muhinzi”, bavuga ko ayo mafaranga ababangamiye mu buzima bwabo bwa buri munsi.

Aba baturage bavuga ko buri muntu wese uca kuri uyu muhanda asabwa kwishyura amafaranga ari hagati ya 100 na 200, cyane cyane abajyayo guhinga mu mirima yabo iri muri iki gishanga ,bavuga ko byabakenesheje.

Umwe mu baturage twahaye izina rya Mukamana (izina ryahinduwe) yagize ati:
“Njye iyo ngiye guhinga mu murima wanjye nishyura amafaranga 200 mu gihe no kugaruka nkayongera nkayishyura harubwo bibeshya kubera nta facture duhabwa. Iyo mfite abana bo kujyana cyangwa ibikoresho byinshi, biba bigoye cyane kuko nta mafaranga twinjiza buri munsi.”

Undi muturage witwa Bizimana, nawe wivugira ko yahohotewe, yavuze ati:
“Hari igihe twatinze kwishyura kubera ko twari twagiye guhinga gusa, bafata isuka yanjye bavuga ko mfite ideni. Ibyo bidusubiza inyuma kuko uba ugiye gushaka imibereho y’umuryango.”

Abana bato nibo uhasanga bamutsa moto barataye amashuri, bakorera amafaranga.

Impaka n’ifatirwa ry’ibikoresho by’abahinzi
Ku wa kabiri tariki ya 6 Nyakanga 2026, HANGA NEWS yasanze hari abaturage batongana n’umwe mu bishyuza, aho yavugaga ko bamwe muri bo bamaze kugira amadeni menshi, bigatuma bafatirwa bimwe mu bikoresho byabo by’ubuhinzi birimo amasuka.

Umuturage w’umusaza uri mu bahinzi bo muri iki gishanga yagize ati:

“Ntitwanga ko umuhanda witabwaho, ariko gutanga amafaranga buri munsi bitandukanye no gutanga umusanzu wateguwe neza n’ubuyobozi. Turasaba ko batwumva.”

Ku ruhande rwa koperative Huguka Muhinzi, abishyuza bavuga ko ayo mafaranga bacibwa ayagenewe kwita ku muhanda, kuko ari bo bawushyiramo ibyatsi, bakawukorera isuku, ndetse bakawufata nk’uwabo bawucunga.

Umwe mu bayobozi babo yagize ati:

“Uyu muhanda uramutse udafashwe neza ntawahanyura. Amafaranga dutanga ni yo adufasha kuwusigasira.”

HANGA NEWS yagerageje kuvugana na Meya w’akarere ka Bugesera, Richard Mutabazi, kugira ngo agire icyo avuga kuri iki kibazo, ariko ntacyo yigeze atangaza, kuko yacecetse.

Abaturage basaba ko ubuyobozi bw’inzego z’ibanze n’akarere bwihutira kwinjira muri iki kibazo, hagasobanurwa niba aya mafaranga acibwa mu buryo bwemewe n’amategeko, ndetse hakarindwa ihohoterwa rikorerwa abaturage bajya kwihingira mu mirima yabo.