Mu Burayi ubukene buri kuvuza ubuhuha – Bimwe mu bigo byatangiye gusezerera abakozi
Amakuru atangazwa avuga ko muri iyi minsi abo mu Burayi batorohewe n’ibijyanye n’ibura ry’akazi aho ibigo byinshi byafashe umwanzuro wo gusezerera abakozi.
Nko mu Bubiligi ibigo bine mu 10 byabajijwe, byasubije ko bifite gahunda yo gusezerera abakozi babyo bigamije gucungura amafaranga yabagendagaho nk’uko byashimangiwe n’amakuru atangazwa na De Zondag.
Muri rusange habajijwe ibigo bigera ku 1568 aho ibigera kuri 39,3% byose byemeye ko byatangiye gahunda iganisha ku gusezerera abakozi babyo nk’uko byasobanuwe na Berd Carette ukora mu itsinda rya RH Liantis rikora mu bijyanye n’itangwa rya serivisi zitandukanye.
Kuva mu ntangiriro za Ukwakira, abakoresha batangiye kunuganuga iby’ibiciro by’ngufu nk’amashanyarazi na gaz nk’impamvu ishobora gutuma habaho iby’ihagarikwa ry’akazi mu buryo bw’agateganyo ndetse imibare igaragaza ko ibigo 784 byateye intambwe yo gusezerera abakozi bagera ku 41.226 mu Bubiligi
Ikigo RH Liantis cyatanze umuburo ku bakoresha yibutsa ko bakwiye kwitwararika mu gihe cyo gusezerera abakozi bakabanza kwizera neza ko biciye mu buryo buteganyijwe.
Inzobere mu by’imitekerereze muri iki kigo, Berd Carette, yagize iti “Kwirukana abakozi biteza umuhangayiko mu buryo bwihariye hagati mu basigaye ku buryo bahorana ubwoba bwo gutakaza akazi, bikanarangira bahisemo kuva muri icyo kigo ku buryo kwirukana bidakwiye kuba intego y’ibanze kuko biherekezwa n’ibibazo byinshi.”
Muri Nzeri umwaka ushize, hirukanwe abakozi bagera ku 1072 mu gihe muri Mutarama hari hirukanwe abagera ku 1853 aho mu Bubiligi.
Ubushakashatsi bwakozwe na Banki Nkuru y’icyo gihugu, buvuga ko abakoresha batarabasha kugarura icyizere bitewe n’ibihe isi iri kugenda icamo muri iyi myaka by’umwihariko mu rwego rujyanye n’ubushabitsi.
