Nyarugenge -Muhima:Umuhesha w’inkiko Mucyo Félix aravugwaho gukoresha iterabwoba yirengagije amategeko akura abaturage mu mitungo yabo – Baratabaza
Umubyeyi Tuyisingize Virginie , utuye mu Mujyi wa Kigali, mu karere ka Nyarugenge, mu Murenge wa Muhima, mu kagali ka Nyabugogo, umudugudu w’ubucuruzi, aratabaza nyuma yaho aguze imitungo n’umugabo witwa MUNYANEZA Emmanuel afatanije n’umugore we witwa MUKABARANGA Consolée igizwe n’amazu ari mu bibanza bifite UPI :1/01/06/04/290 na UPI:1/01/06/291.
Uyu MUNYANEZA Emmanuel afatanyije n’umugore we MUKABARANGA Consolée baca ruhinganyuma bahagurisha undi muntu witwa Gasamagera Benjamin, mu izina rya Company Safari Center LTD rwihishwa, biregagije ko uyu Virginie yahaguze bwa mbere ari muri iyi mitungo.
Virginie ,akimenya amakuru ko imitungo ye yagurishijwe bwa kabiri yihutiye kujya gutambamira iyo mitungo mu kigo cy’i Gihugu cy’ubutaka, ari Nako yiyambaza inkiko ku cyaha cy’uburiganya abarega icyaha cyo Kwihesha ikintu cy’undi.
Nyuma yaje kwitabaza RIB , atanga ikirego ku Cyicaro gikuru cyayo Kimihurura, MUNYANEZA Emmanuel arafatwa arafungwa n’ubwo umugore we bafatanyije kugurisha atafunzwe,akorerwa dosiye ishikirizwa ubushinjacyaha mu rukiko rw’ibanze rwa Nyarugenge.
Nyuma, yaje kuburana ifungwa n’ifungurwa ry’abateganyo, umucamanza witwa Shimiyimana Emmanuel aza kumufungura by’agateganyo yanzuye ko nta mpamvu zikomeye zituma MUNYANEZA Emmanuel akekwaho icyaha cyo kwihesha ikintu cy’undi hakoreshejwe uburiganya yanzura kandi ko Munyaneza Emmanuel arekurwa kandi ko ahita afungurwa akimira gusoma urubanza.
Iki cyemezo cy’umucamanza nticyavuzweho rumwe kuko byashyize benshi mu rujijo , bibaza ibyabaye yashingiyeho arekura uwemeya icyaha ubwo yari mu ibazwa ry’urubanza.
Ubushinjacyaha kuri uru rubanza RC00287/2023/TGI/NYGE bwahise bujurira , urubanza ruri mu bujurire ruzaburanwa Tariki ya 4/3/2024 saa tatu.
Munyaneza Emmanuel yaje kurekurwa aridegembya, mu gihe umuhesha w’inkiko w’umwuga witwa MUCYO Félix yahaye urwandiko uyu Virginie ruvuga ko mu masaha 24 aba yavuye muriyo mitungo nta mananiza abayeho yirengagije ko uru rubanza rwajuririwe rugahabwa numero RC 00287/2023/TGI/NYGE.
Aha niho Virginie, ahera atabaza avuga ko , uyu muhesha w’inkiko Mucyo Félix arimo gukora amanyanga harimo n’iterabwoba abakura mu mitungo yabo kumbaraga ntacyo ashingiyeho.
Baratabaza bavuga ko yirengaje amategeko arimo kubakorera ihohoterwa, yagakwiye gutegereza icyemezo cy’urukiko.
Me Niyonkuru Jean Aimé, Perezida w’urugaga rw’abahesha b’inkiko mu Rwanda, HANGA News twagerageje kumuvugisha ntibyakunze , twagirango tumubaze icyo amategeko ateganya ku muhesha w’inkiko uvugwaho gukora amanyanga asohora abantu mu mitungo yabo ntacyo ashingiyeho , mu gihe uyu Me. Mucyo Félix HANGA News twamuhamagaye tumubaza iby’iki kibazo akupa telephone yacu, n’ubutumwa bugufi twamwandikiye ntacyo yadusubije. Nagira icyo adusubiza turabishyira muri iyi nkuru.
Urwandiko Me. Mucyo Félix yatanze avuga ko masaha 24 uyu mubyeyi aba yavuye mu nzu. Bahakana bavuga ko yirengaje amategeko.
Impapuro zerekana uburyo Gasamagera Benjamin yagurishije inzu abantu 2.
Perezida w’urugaga rw’abahesha b’inkiko mu Rwanda, HANGA NEWS twavugishije turamubura.
