Kamonyi: Abaturage biyemeje kwiyubakira umuhanda, Les Rossignols ibatera inkunga ya Miliyoni 45 Frw
Abatuye Akagari ka Muganza, mu Mudugudu wa Nyagacyamu, bishatsemo ibisubizo mu kubaka umuhanda wa kaburimbo ku bufatanye n’Akarere n’ikigo cy’ishuri Rossignols.
Uyu muhanda uzubakwa ku burebure bwa metero 700 uzubakwa n’ingingo y’imari ya miliyoni 90 aho:
1. Ishuri les Rossignol” ryatanze inkunga ingana na 50%
2. Abarurage: 30%
3. Akarere ka Kamonyi: 20%
Abaturage bo mu Kagali ka Muganza, Umurenge wa Runda, mu Karere ka Kamonyi, bakomeje kugaragaza umuco wo kwishakamo ibisubizo haganijwe kwihutisha iterambere rusange no kunoza aho batuye.
Ubu buryo bwo gufatanya hagati y’abaturage n’ubuyobozi bugaragaza imbaraga zishyirwa mu bikorwa remezo bishingiye ku bufatanye n’imiyoborere myiza imaze gushinga imizi.
Ikintu cyagaragaje ubufatanye budasanzwe ni inkunga yatanzwe n’Ishuri Ecole Les Rossignols, ryiyemeje gutanga Miliyoni 45 Frw, angana na kimwe cya kabiri (50%) cy’uruhare rwose rw’abaturage rungana na Miliyoni 90 Frw. Iki gikorwa cy’ubwitange kirashimangira uruhare rw’abikorera mu guteza imbere aho bakorera no gufasha abaturage kugera ku iterambere rirambye.
Abaturage bavuga ko uyu muhanda uzaborohereza ingendo, woroshye ubuhahirane, wongere agaciro k’imitungo ndetse unafashe mu iterambere ry’uburezi, ubucuruzi n’ishoramari muri aka gace.
Ubuyobozi bw’Akarere ka Kamonyi busanzwe bushimira abaturage bagira uruhare mu bikorwa byo kwishakamo ibisubizo, by’umwihariko kubaka ibikorwa remezo birimo imihanda ya kaburimbo, kuko ari imwe mu nkingi z’iterambere rirambye ry’akarere.
Uyu mushinga ni urugero rwiza rw’uko ubufatanye hagati y’abaturage, abikorera n’ubuyobozi bushobora gutanga ibisubizo bifatika, bikihutisha iterambere ry’abaturage no kubaka ejo hazaza heza h’Akagari ka Muganza n’Akarere ka Kamonyi muri rusange.
