Umurenge wa Masaka wegukanye Kagame Cup 2026 ku rwego rw’Akarere ka Kicukiro
Masaka, Kicukiro – Abaturage b’Umurenge wa Masaka bari mu byishimo byinshi nyuma yo kwegukana igikombe cya Kagame Cup 2026 ku rwego rw’Akarere ka Kicukiro.
Ni intsinzi yakiriwe nk’ikorwa ry’ubufatanye n’ubuyobozi bwiza bubashyira imbere siporo n’imyidagaduro nk’imwe mu nkingi z’iterambere ry’abaturage.
Umunyamabanga Nshingwabikorwa w’Umurenge wa Masaka, Nduwayezu Alfred, yashimiwe cyane n’abaturage ku ruhare rwe mu gutuma amarushanwa agenda neza no gushyigikira ikipe yaserukiye umurenge.
Mu ijambo rye nyuma yo kwakira igikombe, Nduwayezu Alfred yagize ati:
“Intego yacu ni ukuzegukana igikombe cy’Umujyi wa Kigali ndetse tunatumbereye n’igikombe ku rwego rw’igihugu.”
Aya magambo agaragaza icyizere n’icyerekezo cy’uyu murenge mu gukomeza guteza imbere impano z’abakiri bato no gushyigikira siporo nk’imbarutso y’iterambere.
Imyidagaduro nk’inkingi y’imiyoborere myiza
Umuyobozi Nshingwabikorwa w’Akarere ka Kicukiro, Mutsinzi Athaine, yabwiye HANGA NEWS ko ibikorwa nk’ibi bifite uruhare rukomeye mu kwimakaza imiyoborere myiza no kugaragaza iterambere abaturage bagezeho.
Yagize ati:
“Ibi ni ibyishimo dukesha Nyakubahwa Perezida Kagame. Iyo duhuriye hamwe tukidagadura tukishima n’abaturage aho baba bari hose, bigaragaza icyerekezo kiza ku buyobozi.”
Yongeyeho ko amarushanwa nk’aya afasha abaturage gusabana, kurushaho kunga ubumwe no kumva ko bafite uruhare mu bikorwa bibateza imbere.
Intego: Igikombe cy’Umujyi n’icy’Igihugu
Nyuma yo kwigaragaza ku rwego rw’akarere, Umurenge wa Masaka watangaje ko ugiye gukaza imyitozo no kongera imbaraga mu rwego rwo guhatanira igikombe cy’Umujyi wa Kigali, ndetse no ku rwego rw’igihugu.
Abaturage bagaragaje ko bishimiye intambwe bagezeho, bavuga ko siporo ibafasha kuruhuka mu mutwe, kubaka ubusabane no guteza imbere impano z’urubyiruko.
Iyi ntsinzi ya Masaka muri Kagame Cup 2026 ije ishimangira ko siporo n’imyidagaduro bikomeje kuba igikoresho gikomeye mu rugendo rw’iterambere n’imiyoborere myiza mu Karere ka Kicukiro.
