Kwizihiza Umunsi w’Intwari z’Igihugu: Ubuyobozi bw’Akarere ka Kicukiro bushima ubutwari n’ubwitange bya RPA-Inkotanyi
Ubuyobozi bw’Akarere ka Kicukiro bwifatanyije n’Abanyarwanda bose mu kwizihiza Umunsi w’Intwari z’Igihugu ku nshuro ya 32, wizihijwe ku rwego rw’Akarere mu Murenge wa Masaka, Umudugudu wa Ayabaraya.
Iki gikorwa cyitabiriwe n’abayobozi batandukanye b’Akarere, inzego z’umutekano, abagize Inama Njyanama, abafatanyabikorwa b’Akarere, ndetse n’abaturage, bose bagamije guha icyubahiro Intwari z’Igihugu zatangiranye ubwitange n’ubutwari mu kubohora no kubaka u Rwanda.
Mu ijambo rye, Umuyobozi Nshingwabikorwa w’Akarere ka Kicukiro, Mutsinzi Anthoine, yashimye byimazeyo ubutwari bwaranze ingabo za RPA-Inkotanyi, zabohoye u Rwanda zikanahagarika Jenoside yakorewe Abatutsi mu 1994. Yagaragaje ko ubutwari bwazo bwabaye ishingiro ry’umutekano n’iterambere Igihugu gifite uyu munsi.
Yakomeje ashimangira ko izo ngabo zitagarukiye gusa ku kubohora Igihugu, ahubwo zikomeje urugamba rwo kubaka u Rwanda rushingiye ku bumwe, iterambere n’imiyoborere myiza, asaba Abanyarwanda bose kurangwa n’indangagaciro z’ubutwari mu bikorwa byabo bya buri munsi.
Abitabiriye iki gikorwa basabwe gukomeza gusigasira ibyagezweho, guharanira gukunda Igihugu no guhangana n’ibikorwa byose byahungabanya ubumwe n’amahoro by’Abanyarwanda.
Kwizihiza Umunsi w’Intwari z’Igihugu ni umwanya wo kwibuka no guha icyubahiro Intwari zagize uruhare rukomeye mu kubohora no kubaka u Rwanda, ndetse no gukangurira Abanyarwanda bose gukomeza urugendo rwo kwiyubaka no guteza imbere Igihugu.
