Ingabo z’u Rwanda (RDF) zohereje itsinda ry’abasirikare b’inzobere mu bwubatsi muri Jamaica gutanga umusanzu basana ibyangijwe n’ibiza
Ingabo z’u Rwanda (RDF), kuri uyu munsi, Tariki ya 14/1/2026 zohereje itsinda ry’abasirikare b’inzobere mu bwubatsi (Military Engineers) mu gihugu cya Jamaica giherereye mu birwa bya Karayibe, mu rwego rwo gutanga umusanzu mu gusana no kongera kubaka ibikorwa remezo byangijwe n’ibiza byatewe n’inkubi y’umuyaga Hurricane Melissa.
Iyo nkubi y’umuyaga yibasiye Jamaica mu mpera z’umwaka ushize, isenya inzu z’abaturage, imihanda, ibiraro n’ibindi bikorwa remezo by’ingenzi, bigira ingaruka zikomeye ku mibereho y’abaturage ndetse n’ubukungu bw’igihugu muri rusange.
Itsinda ryoherejwe rigizwe n’abasirikare bafite ubumenyi n’ubunararibonye mu bijyanye n’ubwubatsi, gusana no kongera kubaka ibikorwa remezo byangijwe n’ibiza.
Bazakorana n’inzego z’umutekano n’iz’ubuyobozi bwa Jamaica mu bikorwa byo gusana imihanda, inyubako rusange n’ibindi bikorwaremezo byangiritse.
Uku koherezwa kw’izi ngabo gushingiye ku masezerano y’ubufatanye mu bya dipolomasi n’umutekano hagati ya Leta y’u Rwanda na Jamaica, agamije guteza imbere ubufatanye mu by’ubutabazi, guhangana n’ingaruka z’ibiza no kubaka ubushobozi mu nzego zitandukanye.
Leta y’u Rwanda ikomeje kugaragaza uruhare rwayo mu gutanga umusanzu mu bikorwa byo kubungabunga amahoro, ubutabazi n’iterambere ku rwego mpuzamahanga.
Ubufasha butanzwe muri Jamaica bukurikira izindi gahunda zagiye zigaragaza ubwitange bw’u Rwanda mu gufasha ibihugu byibasiwe n’ibibazo byihutirwa hirya no hino ku Isi.
Abayobozi ba Jamaica bashimiye Leta y’u Rwanda n’Ingabo zarwo ku bufatanye n’ubufasha bwihuse, bagaragaza ko buzatuma ibikorwa byo gusana no gusubiza abaturage imibereho myiza byihutishwa.
