Gicumbi:Imboni Generation yasangiye Noheri n’Ubunani b’abanyeshuri batishoboye n’imfubyi biga muri G.S Kinjojo
IMBONI GENERATION YASOHOJE IGIKORWA CYO GUTANGIZA UMWAKA MUSHYA ITANGA ICYIZERE KU BANYESHURI BATISHOBOYE I GICUMBI.
Ku wa gatandatu tariki ya 3/1/2026, umuryango IMBONI GENERATION wasuye G.S Kinjojo iherereye mu Murenge wa Rutare, Akarere ka Gicumbi, mu gikorwa cy’ubugiraneza cyiswe “Umwaka Mushya, Icyizere Gishya” kigamije gufasha abanyeshuri batishoboye n’imfubyi gutangira umwaka wa 2026 bafite icyizere n’icyubahiro.
Muri iki gikorwa, abanyeshuri 59 batoranyijwe nk’abari mu byiciro byihariye bahawe ibikoresho by’ishuri by’ingenzi birimo amakayi n’amakaramu, ndetse banasangira ifunguro n’abagize IMBONI GENERATION nk’ikimenyetso cy’urukundo, ubumwe n’ubufatanye.
Usibye inkunga y’ibikoresho, habayeho ibiganiro byubaka byibanze ku nsanganyamatsiko zitandukanye zifite aho zihuriye n’ejo hazaza h’abana n’urubyiruko, zirimo:
Agaciro k’uburezi nk’ishingiro ry’iterambere rirambye no kurwanya guta ishuri,
Uruhare rw’umuryango n’abaturage mu gutsigira abana mu myigire yabo,
Gutsinda imbogamizi zugarije urubyiruko rw’iki gihe, zirimo ubukene, kwiheba n’ingaruka z’imibereho mibi.
Iki gikorwa cyitabiriwe kandi n’abayobozi b’inzego z’ibanze, abarimu n’ababyeyi, bashimye umuhate wa IMBONI GENERATION mu gushyira umwana ku isonga no gushora imari mu burezi nk’inzira y’iterambere ry’igihugu.
IMBONI GENERATION yagaragaje ko iki gikorwa ari igice cy’urugendo rurerure rwo kugarura icyizere mu bana b’u Rwanda, ikemeza ko izakomeza gushyigikira ibikorwa bigamije iterambere ry’urubyiruko n’imibereho myiza y’abaturage.
“Gushora mu burezi ni ugushora mu hazaza h’u Rwanda,” ni ubutumwa IMBONI GENERATION ikomeje gushyira imbere binyuze mu bikorwa bifatika.
