Musanze: Ku nshuro ya 32, Ibitaro bya Ruhengeri byizihije umunsi mpuzamahanga w’abarwayi.
Kuri iki cyumweru, tariki ya 11 Gashyantare 2024, umunezero wari wose mu bitaro bikuru bya Ruhengeri ahizihirizwaga umunsi mukuru mpuzamahanga usanzwe ari ngarukamwaka, ukaba muri uyu mwaka wari ufite insanganyamatsiko igira iti ” Si byiza ko Muntu aba wenyine” nk’uko bigaragara mu ntangiriro 2: 18.
Ni ibirori byabimburiwe n’igitambo cya Misa yasomwe na Padiri mukuru wa Paruwasi Katedarali ya Ruhengeri Vincent Twizeyimana , Misa yitabiriwe n’imbaga y’abakirisitu baturutse hirya no hino muri Diyosezi Gatolika ya Ruhengeri n’abayobozi mu nzego bwite za Leta barimo n’umunyamabanga nshingwabikorwa w’agateganyo w’Intara y’Amajyaruguru Emmanuel Nzabonimpa.
Mu jambo rye, Umuyobozi mukuru w’ibitaro bya Ruhengeri Muhire Philbert yashimiye ubuyobozi bwite bwa Leta n’abafatanyabikorwa batandukanye barimo n’abana b’abanyeshuri biga mu bigo bitandukanye badahwema gusura abarwayi batagira kirwaza.
Yagize ati ” Mfashe uyu mwanya kugira ngo nongere nshimire ubuyobozi bwite bwa Leta budahwema kutugira inama mu mikorere ndetse n’ubufasha baduha mu gusigasira ubuzima bw’abarwayi tuba dufite hano mu bitaro. Ndashimira kandi n’abandi bafatanyabikorwa batandukanye barimo n’abanyeshuri biga mu bigo bitandukanye bajya baza gusura abarwayi hano mu bitaro baba badafite kirwaza.”
Umushyitsi Mukuru muri ibi birori yari umunyamabanga nshingwabikorwa w’agateganyo w’Intara y’Amajyaruguru , Nzabonimpa Emmanuel yashimiye abaturage bagira umutima utabara bagasura abarwayi batagira kivurira ndetse anashishikariza abaturage kujya bishyura ubwisungane mu kwivuza bakirinda kurembera mu rugo.
Yagize ati ” Ndashimira abagira umutima utabara bagasura abarwayi mu bitaro ndetse n’ubuyobozi bw’ibitaro kuri serivisi nziza muha ababagana kuko iyo mubarangaranye no nko kubahuhura.
Nasaba kandi n’abaturage kujya mwishyura ubwisungane mu kwivuza kuko bibarinda kumbera mu rugo. Ikindi nabasaba ni ukujya mwipimisha indwara zitansura kandi mukanya mukora siporo kuko nayo ni ingenzi mu buzima.”
Habyarimana Gad ni umwe mu barwayi bamaze igihe kirekire muri ibi bitaro kuko amazemo imyaka 10 kubera uburwayi.
Aganira na Hanganews.com yavuze ko bashimishijwe n’uburyo abayobozi batandukanye babasuye.
Yagize ati ” Kuba uyu munsi twasuwe n’abayobozi batandukanye byadushimishije kuko baduhaye agaciro kuri uyu munsi mpuzamahanga ngarukamwaka kuko bagize n’ibyo badufashisha twari dukeneye cyane ko abenshi tumaze mu bitaro igihe kinini kuko nkanjye mazemo imyaka 10 kuko hari ubwo tuba twihebye. Urumva ko ubufasha bampaye buragira icyo bunyunganira ku bushobozi buke nsigaranye. Ahubwo Imana ibahe umugisha, isubize aho bakuye.i ubwo tuba twihebye. Kuba abantu baza bakifatanya natwe ku munsi wahariwe abarwayi ni iby’agaciro”.”
Mugenzi we Nizeyimana Jean Claude nawe ufite uburwayi bw’impurirane yagize ati ” Nanjye nashimishijwe nuko kuri uyu munsi mukuru mpuzamahanga w’abarwayi abayobozi baje kwifatanya natwe mu burwayi bwacu, bityo tukaba tubashimira uwo mutima w’impuhwe batugiriye cyane ko hari n’ubufasha twahawe twari dukeneye. Bakoze cyane kandi uwo mutima bazawuhorane.”
Umunsi mpuzamahanga w’abarwayi, washyizweho na Mutagatifu Papa Yohani Pawulo wa II mu mwaka wa 1992, ukaba usanzwe wizihizwa ku rwego rw’isi buri mwaka tariki ya 11 Gashyantare. Ariko mu Rwanda, Abepiskopi bemeje mu mwaka wa 1992 ko uzajya wizihizwa ku cyumweru cyegereye itariki ya 11 Gashyantare kugira ngo urusheho kwitabirwa n’abakristu benshi ku munsi w’Imana.
Abarwayi bo mu bitaro bya Ruhengeri bahawe impano zinyuranye zirimo imyabaro, ibiribwa, ibinyobwa , ibikoresho by’isuku n’ibindi.
YANDITSWE NA: SETORA JANVIER
