Umurenge wa Kigali wasoje ukwezi kwahariwe Ubumwe n’ubudaheranwa -RIC yashyikirije inzu yasaniye umupfakazi wa Jenoside
Mu rwego rwo gusoza ukwezi kwahariwe Ubumwe n’ubudaheranwa , mu murenge wa Kigali ,umupfakazi wa Jenoside yakorewe abatutsi utishoboye yashyikirijwe inzu yasaniwe n’abahagarariye amadini n’amatorero kubufatanye n’ubuyobozi.
Umukecuru witwa Mukagashugi Bersila, n’umupfakazi wa Jenoside utishoboye utuye mu mudugudu Amajyambere, akagari ka Mwendo, mu murenge wa Kigali ,akarere ka Nyarugenge, uyu wa 31/10/2022 yashyikirijwe inzu yasaniwe ndetse n’ubwiherero yubakiwe n’abayobozi bahagarariye amadini n’amatorero muri uyu murenge wa Kigali.
Pasiteri Shutiraguma Jean Baptiste, umuyobozi wa RIC (Amadini n’amatorero) mu murenge wa Kigali ,yavuze ko iyi nzu basaniye uyu mukecuru byavuye mu busabe by’abakirisitu ndetse n’ubuyobozi aho bavugaga ko uyu mukecuru abayeho nabi inzu yenda kumugwaho.
Ati:”Iyo nzu yasannye bivuye mu bwitange bw’abakirisitu , twishatsemo ubushobozi dukusanya amafaranga asanga Miliyoni ebyiri , twubatse n’ubwiherero , twaje uyu munsi kumusura twamuzaniye ifunguro ndetse n’uburyamiro, n’intebe zo kwicaraho kugirango akomeze kubaho neza”.
Hitimana Pie, Perezida wa Ibuka mu murenge wa Kigali, yavuze ko uyu mukecuru ari umupfakazi wa Jenoside utishoboye , ati:”Uyu mukecuru n’umupfakazi wa Jenoside, umugabo we n’abana 4 Bose bishwe muri Jenoside yakorewe abatutsi, abayeho adafite umufasha ,ariko ndashimira abayobozi b’abadimi bamusaniye inzu natwe tuzakomeza kumwitaho uko bishoboka”.
Ntirushwa Christopher, umunyamabanga Nshingwabikorwa w’umurenge wa Kigali ,yashimiye abayobozi b’abadini n’amatorero ubwitange bagaragaje mu gufasha abatishoboye, ati:”Igikorwa mwakoze nicyo gushima, Imana ibahe umugisha dukomeze gusana imitima y’ababaye , twubaka u Rwanda twifuza.
Uyu mukecuru wasaniwe inzu , yavuze ko yishimye Kandi ashimira Imana yatumye bamwibuka , avuga ko afite Imyaka 77 ariko bitumye asaza neza afite Aho yicara heza , naho arambika imusaya n’inzu nziza.
