Polisi yasobanuye ko utwara Scooter agomba kuba afite uruhushya rwo gutwara ibinyabiziga icyiciro cya A
Polisi y’u Rwanda, ibinyujije ku rubuga nkoranyambaga rwa X, yasobanuye ko umuntu utwara scooter asabwa kuba afite uruhushya rwo gutwara ibinyabiziga rwo mu cyiciro cya A.
Ibi byasobanuwe mu gisubizo Polisi yahaye umuturage witwa Diedonné, wabazaga niba umuntu utwaye scooter yabazwa uruhushya rwo gutwara, mu gihe ikinyabiziga akoresha gikoresha amashanyarazi.
Polisi yasubije ishimangira ko scooter ibarwa mu binyabiziga bisaba uruhushya rwo gutwara rwo mu cyiciro cya A, kimwe n’ipikipiki.
Polisi yibukije abakoresha umuhanda bose ko kumenya no kubahiriza amategeko agenga imikoreshereze y’ibinyabiziga bitandukanye ari ingenzi mu kwirinda impanuka no kubungabunga umutekano rusange.
Yakomeje igira inama abatwara scooter n’abandi bose bakoresha ibinyabiziga bya moteri kujya babanza kubona impushya zibibemerera, ndetse bakajya bitwararika mu muhanda, bubahiriza ibyapa n’amategeko awugenga.
