Uwari Gitifu wa Kigali Ntirushwa Christopher yitabye urukiko ahakana ibyaha aregwa
Uwahoze ari, umunyamabanga Nshingwabikorwa w’umurenge wa Kigali, mu karere ka Nyarugenge, hamwe n’ushinzwe irangamimirere Musafiri Maurice (Etat Civil) , uyu wa 5/3/2025 bitabye urukiko rw’ibanze rwa Nyarugenge, bisobanura ku cyaha bakurikiranyweho cyo Gukoresha ububasha bahabwa n’itegeko mu nyungu zabo bwite.
N’urubanza barimo kuburana ku ifungwa ry’agateganyo ry’iminsi 30.
N’urubanza baburana rufite Numero RDP00158/2025/TB/NYGE ,aho buri wese aregwa iki cyaha ”Gukoresha ububasha ahabwa n’itegeko mu nyungu bwite”.
N’urubanza rwatangiye abaregwa bombi bahari ,ubona ko bakomeye bunganiwe n’abanyamategeko babiri.
Ubushinjacyaha buhagarariwe na Me Pascal, bwasobanuye ko, bwisunze amategeko bwongeye gusaba ko batabwa muri yombi bagakurikiranwa bafunzwe, mu rwego rwo kugiraga ngo badasibanganya ibimenyetso cyangwa ngo batoroke ubutabera.
Abunganizi mu mategeko bunganira Christopher na Maurice bavuze ko bitumvikana uburyo abakiriya babo Ubushinjacyaha bwongeye gusaba ko bakurikiranwa bafunze ku cyaha kimwe , mu gihe mbere bari barekuwe bakajya bitaba buri wa Gatanu, Imbere y’inteko iburanisha.
Bavuze bati:”Banyakubahwa bacamanza , Ubushinjacyaha ntabwo bwari bukwiye kwivuguruza kucyemezo cyafashwe mbere, mu gihe uwo barekuye batigeze bamushaka ngo bamubure cyangwa ngo Abe yarananiranye kubahiriza igihe yahawe cyo kwitaba, ikindi n’inyito y’icyaha ntabwo yahindutse ngo tumenye ko hari ibindi byaha bishya bakurikiranyweho”.
Ubushinjacyaha bwongeye guhabwa ijambo Buti:”Impamvu twongeye gusaba ko bafungwa nuko icyaha bakurikiranyweho igihano cyacyo kiri hejuru y’imyaka 2, ikindi nuko icyaha bakoze bagomeye igihugu kubera ko inyungu rusange bazigize izabo bwite”.
Ubushinjacyaha bwakomeje buvuga ko, hari ibindi bimenyetso bishya byatumye bongera gusaba ko bafungwa birimo indonke aho basezeranyije abageni bamaze guhabwa amafaranga asaga ibihumbi mirongo itanu (50,000) Rwf , kubera ko service basabaga batari bujuje ibisabwa, rero basezeranyije Feridina na Ingabire Rebecca hari umwe utujuje Imyaka y’ubukuru ,bwasobanuye ko yari afite Imyaka 19.
Ntirushwa Christopher, yiregura imbere y’urukiko yagaragaje ko ibyo aregwa Atari byo, yagize ati:'”Banyakubahwa bacamanza , Ayo mafaranga agaragazwa n’ubushinjacyaha ko ari indonke ntabwo ariko bimeze , ahubwo yishyuwe abageni basaba gusezerana umunsi wabo wihariye, kuko banafite inyemezabwishyu, ntabwo Yaba Ruswa Kandi mubona yaramenyeshejwe icyo bayishyuriye”.
Ikindi basabye ,urukiko ko barekurwa bagakurikiranwa bari hanze nkuko byari byemejwe mbere ,dore ko bagaragarije urukiko ko batanze igwate ihagije.
Urukiko rumaze kumva icyo Ubushinjacyaha buvuga n’abiregura icyo bavuze, bwatangaje ko urubanza ruzasomwa Tariki ya 11/3/2025 ku isaha ya saa cyenda.
Andi makuru agera kuri HANGA NEWS, twahawe na bamwe batifuje ko dushyira mu nkuru imyirondoro yabo ku mpamvu z’umutekano bavuze ko, aba bafunzwe ku mpamvu babona zirimo akagambane kubera ko bongeye gufatwa nyuma yaho Ntirushwa Christopher yandikiye komisiyo y’abakozi ba leta agaragaza akarengane arimo gukorerwa mu igenzura rwakozwe , ngo Komisiyo y’abakozi ba leta yandikiye ubuyobozi bw’umujyi wa Kigali basaba ko yasubizwa mu kazi.
Emma Claude Ntirenganya , umuvugizi w’umujyi wa Kigali, HANGA NEWS twamubajije iby’iki kibazo byavuzwe ko komisiyo y’abakozi yandikiye umujyi wa Kigali babasaba ko Ntirushwa Christopher asubizwa mu kazi, atubwira ko agiye kudushakira amakuru, inkuru yandikwa yageze aho isohoka ntacyo aradutangariza, nagira icyo atubwira durabishyira mu nkuru itaha….
